Kolasib District Fisheries Development Office, Kolasib Project Veng a mi Rs.123,57,174/- senga sak chu vawiin khan Dr.BD Chakma, Minister Fisheries etc. chuan a hawng.

Hawnna inkhawmah hian Dr.BD Chakma chuan mimal inluah ngailo a, mahnia building DFDO,Kolasib in a nei ta chu lawmawm a tih thu a sawi a, chutihrualin a ken tel a enkawl mawhphurhna tha taka hlenchhuak turin a thawkte a chah a. Kolasib district a Sangha tharchhuah a hralhchhuah leh a vawn thatah hmasawn nan Landing centre Serlui 'B' ah siam a nih tur thu sawiin, hei hian sangha tharchhuah a tihpun ngei a beisei thu a sawi a. National Fisheries Development Board hmalakna in Fish Festival kuminah hman a nih dawn thu sawiin, exhibition cum sale tura duan a nih thu a sawi bawk.

Vawiin a hawn tak DFDO, Kolasib building hi 20th August, 2011 ah sak tan a ni a, chhawng hnih a sak niin, Conference Hall leh Chowkider Quarter 1 a awm tel a ni. Kum 2008 khan DFDO office hi Kolasib-ah hawn tan niin, Kolasib Diakkawnah mimal in luahin an awm thin a ni.

Kolasib District chhungah hian Sangha dil 3000 vel awmin, tuikhuah zau zawng belhkhawm hi 1136 hectare a zau a ni a. kum 2015- 2016 a Sangha tharchhuah zawng zawng zat chu 1817 metric ton a ni. Hei bakah hian kum 2015-2016 vek khan Serlui Hydel Project a Cage Culture atangin Sangha phuhlip neilo 505quintal zet tharchhuah a ni a. Tun dinhmunah NLUP hnuaia Sangha dil siama eizawng mi 514 zet an awm bawk.

Vawiin building hawnna inkhawm hi Pu Lalthlamuana, Secretary, Fisheries in a kaihruai a. Pu H.Lalengmawia, Deputy Commissioner , Kolasib district chuan lawmpuina thu sawiin, Kolasib District chhunga sorkar hmalakna thenkhat a tarlang a. Pu SP Singh,Director Fisheries in Department hmalakna te a tarlang bawk a ni.