No.551/2020-2021

Vawiin chawhnu khan tun lai hrileng mek Covid-19 chungchangah Champhai District Hospital Doctor-te leh Champhai Chanchinbumite  chuan DMS Seminar Room-ah inkawmhona hun an hmang.

He hun kaihruaitu Dr. Zatluanga, District Medical Superintendent (DMS) Champhai chuan Covid-19 hrileng  chungchanga inkawmhona leh inrawnkhawmna hun buatsaih ngaipawimawha kalkhawmte lawmna thu sawiin,   Covid-19 hri len tantirh atangin District Hospital-ah inpuahchahna   kalpui nghal vat anih thu leh Doctor thiam tak tak te’n mipuite hnena zirtirna an pe thin chu chhuanawm a ti a. Hri len tantirh inkharkhip anih atanga OPD  dawrtu kal dan  kimchang tarlangin, Damdawiin chu natna taidarhna hmun anih lohna tura kan zavaia fimkhur angai a, mipuite pawh a tul tawpah lo chuan  Damdawiin lam pan lo hram tur leh, damlo awmpui pakhat bakah kantu pawh awm an phal rih loh thu a sawi a. Sawrkar remruatnain Dedicated Covid-19 Centre atan Surgical Ward khum 20 awm theihna  ruahman anih thu a sawi a. Chanchinbumite chu mipuite hnena zau thei ang bera zirtirna pek leh thurawn lak leh finchhuah kawnga tanrualpuiah a sawm nghal a ni. 

Dr. Lallawmkima, District Information & Public Relations Officer (DIPRO) Champhai pawhin Covid-19 hrileng mek karah mipuite hnena thu dik leh rintlak chauh thehdarh a pawimawh thu sawiin, Damdawiin lama thawktute leh Media lamte inkara thawhhona tha tak awm chu fakawm a ti a. Natna hrileng avanga harsatna awm mek  karah thawhhona leh inpawhtawnna tha zawk awm zel se tiin, hun harsa tak  tawn mek kara Chanchinbumi te’n an nitin hnathawhte an chhunzawm hram hram chuan hrileng beih kawnga an thahnemngaih zia a tihlan thu a sawi bawk. 

Dr.J.Lalramchhuanga, MD, Senior Specialist (Medicine), District Hospital Champhai chuan hrileng mek chungchang mipuite zirtirna pe thintu pawimawh tak  Chanchinbumite nena inkawmna hun buatsaih a ni chu lawmawm a tih thu a sawi a. Khawvel pum leh India rama hrileng vanga tawrhna hrang hrangte tarlangin, Champhai district chu  ramri depa awm anih avangin hmun dang aia fimkhur lehzual angai a ni, a ti a. Khawvel puma hripui leng  chu khuahkhirh anih loh chuan mipuiah inkaichhawn huk theih ani a,  mipui  za zela 60-80 thlengte kai thei tura chhut a ni a,  chumi zinga za zela 20 te Damdawiin luh ngai leh za zela 5 te ICU luhpui ngai anga chhut a ni, a ti a.  Khawi ram mah tan duhthusama lo inpuahchah lawk theih ani lo a, Health Care System-in a   tlin tawk bak damlo neih chu hripui lengah a awm dawn avangin a hlauhawm hle a, enkawl zawh tawk chauh damlo kan neih theihna turin a hrikai leh thehdarh lo tura tanlak tlan angai a, pumpelh dan tha ber chu lo invenlawk hi a ni, a ti bawk.  Dr. J.Lalramchhuanga chuan Covid-19 natna  hmelhriatna chu ni za chuang awrh chauh a ni a, Indian Council of Medical Research (ICMR) zirchianna   chuan za zela 69 te chu langchhuak loa  hri vei leh za zela 31 ah chauh a lanchhuah avangin fimkhur a ngai hle a ni, a ti a.  District Hospital pawh  mamawh tak tak tute tan a inhawn reng rualin, tun hma anga tlawh huk emaw, tul lutuk lova tlawh loh a that thu  sawiin, mipuite chu sawrkar thupek leh ngenna siamte zawm hram hram turin a ngen a ni. 

Pu Lalhmingmawia Pachuau, Champhai District MJA President pawhin thusawiin, an phak tawkah thahnemngai takin mipute zirtirna kawngah an penchhuah thin thu sawiin,  phaktawka   khawtlang leh ram tana theihtawp chhuah chhunzawm zel an tum thu a sawi a. DMS Champhai hmalakna a inkawmhona leh inzirtirna hun tha tak siam ani chu fakawm a ti a. Mipuite hnena puanzar tur tulte Media lamte hrilhhre zela, infinchhuaha  intawiawm tawn puiah Damdawiin thawktute a sawm bawk a ni. 

He hunah hian  inkawmhona leh inrawnkhawmna hun neih a ni a. Zawhna leh chhanna hunte siam niin, hun hlawkthlak tak hman a ni.