No.550/2020-2021

Mamit 23rd April, 2020 : Vawiin khan DC Conference Hall, Mamit-ah Dr. Lalrozama, IAS, District Bawrsap, Chairman, District Level Task Force on COVID-19 hovin Mamit khawpui chhunga Village Level Task Force-te thutkhawm a ni.

Meeting-ah hian Novel Coronavirus hrileng mek avanga ram pum huap Lockdown neih mekah mipuite nitin mamawh hrang hrang bakah khawtlang inrelbawlna-te sawiho a ni a. Inkharkhipna kalpui mekah mipuite ei leh bar leh nitin mamawh ngaihtuahna kawnga chet a awlsam zawk nan May Ni 3, 2020 thlengin kartin Nilaini leh Inrinni-ah Mamit khaw chhunga dawr zawng zawng inhawn phalsak an ni a. Zing dar 6 atanga tlai dar 5 thleng inhawn theih a ni ang. Heng dawr inhawn theih Ni-ah te hian hrileng laka kan him theih nan mumal zawk leh kalphung tha tak neia indawrna kalpui nise tih a ni a. Social Distancing ngaipawimawh turin Meeting chuan mipuite a ngen nghal bawk.

Meeting-ah hian inhlawhfa-a thawkchhuak duhte chhuah phalsak nise tih niin hnathawh tur neite'n vawikhatah mi panga aia tam lo chhawr phalsak an nih angin kalpui ve nise tih a ni a. Mamit Police Station Thana bula Mamit khawpui chhunga ruihhlo ngai, inkharkhip chhunga pawna chhuak lui an khungkhawm mekte ei leh in tur chungchang sawiho niin Police Thana Mess zawm hrih mai se tih a ni bawk.

Vawiin Meeting hian Mamit khawpui chhunga dawrkai leh sumdawngte chu mipuite hmakhua ngai a, tunlai boruak leh chhungkaw tinte harsatna tawh mek hrethiam a, an thil zawrhte hlep uchuak taka hralh lo turin a ngen a ni.

Vawiin thutkhawmah hian Mamit khawpui chhunga VLTF Chairman-te bakah thutharthehdarhtute an tel a ni.