1468/2023-2024

Champhai the 11th August, 2023 - Champhai District Hospital chuan 2nd Prize Kayakalp Award 2022-2023 leh1st Prize Eco-Friendly Award 2022-2023 lawmman an dawnte chu vawiin khan ZNS Picnic Spot, Mualkawi ah an lawm. Lawmna program ah hian Dr ZR Thiamsanga, Champhai North AC MLA & Vice Chairman, H&FW Board chu khuallian niin Champhai Deputy Commissioner Pu James Lalrinchhana chu khualzahawm a ni.

Champhai North AC MLA & Vice Chairman, H&FW Board Dr ZR Thiamsanga chuan kum tam tak amah ngei alo thawh thinna Champhai District Hospital in hmasawnna ropui tak hmu chhovin State pum huap lawmman tha tak tak an dawng chu thawktu zawng zawngte inpekna leh thawhrimna rah anih bakah, NGO-te leh khawtlang hruaitute tawiawmna rah a ni tiin, an zavaia chungah lawmthu a sawi a. Covid-19 hrileng avanga harsatna nasa tak kan tawh hnuah Mizoram chuan harsatna khirh tak tak engemawzat - lirnghing, vawk hri leng, ramri buaina, Myanmar leh Manipur buaina avanga raltlante buaipui chhoh a ngai a, heng te avang hian hmasawnna hna te pawh duh angin a thawh chak thei lo a ni, a ti a. Heng harsatna hrang hrang karah hian Sawrkar chuan theihtawp chhuah zelin H&FW kaihhnawih hmasawnna ruhrel te pawh ruahman belh mek zel a ni, a ti a. Champhai Nursing School chu kar leh maiah hawn tura peih fel tawh niin damlo na zual te enkawl na tur Critical Care Block Champhai District Hospital a buatsaih turin hmalakna a kal mek bawk a ni, a ti a. Mi harsa zawk ten Aizawl Hospital leh ZMC ah te awlsam zawka enkawlna an dawn theihnan referal service/system mumal deuh Sawrkarin duang chhoh a tum thu a sawi a. National Certified Hospital ni tura District Hospital Champhai hmalakna kal mek chu lawmawmin an chhuanawm a tih thu sawiin an hlawhtlin ngei theihnan duhsakna a hlan bawk a ni.

He huna khualzahawm Champhai Deputy Commissioner Pu James Lalrinchhana chuan Champhai District Hospital in State pum huap Hospital fai leh thawk tha lawmman an dawng chu lawmawm tiin, Champhai District pum tan chawimawina chhinchhiah tlak leh mellung pawimawh tak a ni, a ti a. Ram leh hnam hmasawnna turin mipuite hriselna a pawimawh hmasak takzet thu sawiin Champhai District Hospital mamawh khawl leh ruhrel te pawh sawrkar leh CSR kaltlangin ruahman belh zel tum a ni, a ti a. Damlote hmangaih leh dawhthei taka enkawl thin tu Doctor, nurse leh thawktu zawng zawngte chungah lawmthu sawiin an hna chu Pathian rawngawlna pawimawh tak a nih tih hriaa tan la sauh turin a chah bawk a ni.

Vawiin program hi Dr Zatluanga, Disitrict Medical Superintendent, District Hsopital Champhai in a kaihruai a. Dr Lalramengi, Medical Officer chuan Kayakalp report a pe a, Pi Sikulthangi, Ward Superintendent chuan lawmthu sawina hun a hmang a ni.