1467/2023-2024

Vawiin khan School Education Minister Pu Lalchhandama Ralte chuan Ngopa-a Sub-Divisional Education Officer Office a hawng.

Minister chuan he SDEO Office hawnna puala inkhawm Jubilee Hall Ngopaa neihah thusawiin tun sorkarah hian SDEO pakhat chiah hawn a ni a, chu chu Ngopa hi a ni a ti. Ngopain SDEO office bakah tun hnaiah Science zirna hawn a ni ta chu a hlu hle a ni a ti. Mizoram pumah Zirtirtu post fill-up loh hi 3000 chuang a awm tawh a; SEDP teacher te, MR teacher te lak an ni a, a nghet leh nghet lova lak 2700 vel an awm tawh a ni a ti. Mizoram sorkarin zirna hi a ngai pawimawh a, a arkhawthim dai lo, awmze nei takin a kalpui a ni a ti. He ram leh hnam hian nihphung identity a nei a, chu chu zirlaite thinlungah tuh zel tum anih avangin 'Zonun' tih chu zirlaibuah pawh hman thar a ni a ti.

Pu Lalchhandama Ralte chuan hripui len laiin ram dangah chuan eng Exam mah tihdan phung pangngaia kalpui theih a ni loh laiin, Mizoram chiah hian Board Exam a nih dan pangngai thlapin a buatsaih thei a ni tih a sawi a. Mizorama zirna syllabus pawh hmundang nena khaikhinin hniam chuang lo, all India standard a nih thu leh zirtirtute pawh training pek țhin an nih bakah lak tharte chu qualified trained vek an nih thu a sawi.

Khualzahawm Pu L. Thangmawia Bialtu MLA leh Vice Chairman HRD Board chuan Ngopaah SDEO neih tihhlawhtlin a lo ni thei ta chu lawmawm a tih thu a sawi a. Sorkar hmasain tihlawhtling hman lo mahse, hma an lo laknaah lawmthu a sawi a, zirna lama thawktute tan hmun danga office dawr tura kal ngai lova, mahni khuaa chinfel theih a ni dawn ta chu lawmawm a tih thu a sawi.  Pu L.Thangmawia chuan tun sorkar term kal laiah hian zirtirtu pension 950 chuang an awm tawh a, Headmaster-a kaisang 540 an awm bawk a ni a ti a. Department enkawl hautak ber a ni naa hmasawnna hmuh tur tam tak a awm chu a lawmawm hle a ni a ti.

School Education Minister Pu Lalchhandama Ralte chuan vawiin khan Govt. Saitual Higher Secondary School Commerce leh Science building sak thar leh Netaji Subhas Chandra Bose Avasiya Vidyalaya hmeichhe hostel zirlai 30 awm theihna tur chu a hawng bawk.

Ngopa SDEO Office hawnna inkhawm hi Dr  Lalzirmawia Chhangte, Secretary, School Education Department-in a kaihruai a; Pu Lalsangliana, Director, School Education Department chuan kalkhawmte lawmna  thu a sawi a. He  hunah hian Minister leh bialtu MLA te bakah Pu C.Lalnuntlanga Sinlung Council Executive Member te, School Education Department Officer-te, Samagra Shiksha officer-te, Ngopaa zirtirtute,  sorkar hnathawk te, tlawmngai pawl hruaitute, MNF party hruaitute leh khawtlang hruaitute an kalkhawm a ni. Ngopa SDEO office hawn tharah hian post siam bakah DDO power pek nghal a ni a, SDEO leh a thawhpuite dah nghal an ni.