No.3339/2019-2020 

Champhai District chhunga Novel Coronavirus Disease (Covid -19) vei an awm palh thulh pawha chet lak leh inenkawlna tura inpuahchahna  District Hospital, Champhaia kalpui chu vawiin khan  Pu Mark Lalthanliana, Addl DC Champhai hova enfiah niin, inrawntlanna hun neih a ni.  

Champhai District chhunga inpuahchahna kalpui mek chungchanga inrawnkhawmna  District Medical Superintendent (DMS)  kaihhruaia neihah  Pu Mark Lalthanliana chuan Covid-19 laka lo inlvenlawkna tura district chhunga hmalaknate tarlangin, mawhphurhna hrang hrang changtute’n mahni hmazawn theuha thahnem ngai taka an thawk thin chu fakawm tiin, hun harsa tak kan tawh mek chuan  thawhhona leh inpawhlehzualna   rah tha tak a chhuah a beisei thu a sawi a. Mipuite hriselna tura huaisen taka theihtawp chhuahtu damdawi lam thawktute chu an hnathawh mek leh hmachhawpte DC Office hrilhhre  zel tur leh mamawh an neihte pawh thlen zel tura chahin,  mamawhte a tul ang zelin ngaihtuah a ni ang, a ti a. Mipuite zirtir kawngah chak leh zuala hmalak angaih thu pawh sawiin, tlanchhe mai lova tlawmngai taka an tihturte hlen zel turin a chah nghal bawk a ni. 

Dr. R. Lianmawia, CMO Champhai pawhin an hmalakna tlangpui tarlangin, Champhai District tana Quarantine Centre tura duan Zokhawthar Land Custom Station-ah mi 6 dah mek an nih thu leh Tlangsam Quarantine Centre-ah tumah dah luh an la awm rih loh thu  a sawi a. In lama khung hran mi 355 an awm mek thu leh Contact tracing kaltlangin Undivided Champhai District atangin Sample 4 endik tura thawn mek anih thu a sawi a. Covid-19 vei an awm thulh pawha enkawltu turte hman tur thuamhnaw bik  PPE neih mek leh  sawrkar lam  atanga   dawn leh turte bakah damdawiin a thawktu  Logistics and Supporting staff te’n a remchan dan anga an siam belh mek zel thu a sawi bawk. 

Dr. Zatluanga, District Medical Superintendent chuan tul bik leh loh theih loh thilah lo chuan mipuite pawh Damdawiin lam pan lo tura an hrilhhriat thu sawiin,  District Hospital Champhai-ah pawh a ni telin  OPD leh  Casualty pantu an tlem ve zel rih thu a sawi a.    Damdawi in a dah luh damlo pawh an kiam thu sawiin, Damdawiin lama thawktute tan Covid-19 laka lo inpuahchah lawkna atan Meeting leh Training te pawh vawi duailo neih tawh a ni, a ti a. Covid-19 natna veite enkawlna tur atana  team siamte, an hnathawh dan tur leh   mawhphurhna neihte a sawifiah  a. Khawtlang mipui, VC, NGO leh Media lamte nena thawhhona tha tak neih ani tiin,  District Hospital Champhaiin tanpuina sumfai leh hmanruate an dawn reng thu a sawi a. District Hospital Champhaiah Nursing Staff 2, Lalduhthlani, BSc Nursing, D/o R.Lalzamliana, Champhai Kahrawt  leh Monica Niangdawnkimi, IELTS, D/o Caroline Niangkhanzovi, Champhai Vengthar te chuan tlawmngaih chhuahin  a tul ang zela  District  Hospital Champhai pui turin an mahni duhtlannna  ngeia an  inpek thu tarlangin, chhuanawm a tih thu a sawi bawk. 

Covid-19 natna vei damlote enkawlna tura  ruahmanna felfai taka kalpui  hmunhma hrang hrangte fan kual niin, Treatment Team Leader Dr. J. Lalramchhuanga, MD, General Medicine  hnen atangin Isolation Centre kalpui anih dan turte, thianghlim taka damdawiin vawn leh uluk taka endikna kalpui anih dante ngaihthlak a ni a.  Mamawhtute tan damdawiin pan kher lovin Mobile phone atanga   inrawn thei tura an inhuam thu leh inlama inkhung hrang te  pawh a theih ang anga biakpawha  vil zel an ni, a ti a.  Tun dinhmunah hian Covid-19 veite enkawlna  bik tura siam Isolation Centre khum 5 awm theihna chu peihfel tawh niin, mamawh thulha hman theih mai turin khum 20 awm theihna tur  hual lawk ani tawh bawk a ni. Mipuite  puipunna laka fihlima  inkharkhip tlat tur leh kut fai taka sil thin tura chahin,  harsatna an neih pawha damdawi lam thawktute be hrehlo turin chah  a. Covid-19 veite enkawlna tura damdawi hman thin Hydroxychloroquine chu lo invenlawkna atan ti a tawng pawng lei vak   anih avangin mamawh ang zat neih a har thu a sawi a. Mithiamte rawn lova mahni ngaihdan anga ei ve ngawt chuan nghawng thalo a tlen thieh thu leh Covid-19 veite, rinhlelh leh damdawi lama thawktute tan bika tih anih avangin mahni in lama lo kawl an awm chuan damdawiin lama thawktute hriattir zel turin a chah a ni.   

Dr R.Lalrinmawia, MD, Anaesthesiology & Critical Care Medicine,  Assistant Leader, Treatment Team hnen atangin ICU chhunga khawl hrang hrangte hnathawh leh tul thulha hman angaih pawha ruahmanna siamte a sawifiah a ni.   Inrawnkhawmna hunah hian Covid-19 chungchang zau zawka mipuite hnena zirtirna ‘Talk Show on Covid-19’ Cable TV kaltlanga neih nise tih a ni a. Covid-19 dona  kawnga tha thlah lova thawktu zawng zawngte fakin an chhuanawm thu tarlan  a ni bawk. 

Vawiin damdawiin enfiahna hunah hian Dr. Lallawmkima DIPRO,  Pi Esther Leihang, SDC, Doctors , Media leh Hospital Staff te an tel a ni.