No.5064/2020-2021

Dated Champhai, the 14th September, 2020: District Hospital Champhaia Mini RT-PCR (TrueNat Quattro) Bio-Safety level-2 Laboratory bun thar, Covid-19 natna kai leh kai loh finfiahna tur khawl chu vawiin khan hman tan a ni. A bul tan nan vawiin hian DPRC Quarantine Centre atanga lak sample 6 te endik hna kalpui a ni. TrueNat Laboratory hi Dental OPD Building tura ruahman in mal din chei danglama siam a ni.

Khawl thar hman tan puala inhrilhhriatna hun hman hi Dr. Zatluanga, Medical Superintendent, District Hospital Champhai chuan a kaihruai a. CMO Champhai Dr.R Lianmawia chuan Champhai district tana TrueNat khawl bun thar hman theih ani ta chu lawmawm a tih thu sawiin, sawrkar hmalakna leh kan zavaia tanhona vanga tiang hun thleng thei hi kan ni, a ti a. Champhai district tana tangkai taka hman anih ngei a beisei thu a sawi bawk.

Dr.J.Lalramchhuanga, Leader, Covid-19 Treatment Team chuan tun dinhmunah Champhai District-ah Covid-19 vei 2 enkawl mek an nih thu leh an dinhmun a that thu a sawi a. Covid-19 laka fihlim tura hmaituamna vuah, kut silfai ngun, social distancing ngaihpawimawh leh sawrkar duan inkaihhruainate zawm zel a tul thu a sawi bawk.

Technical report petu Dr.R.Vanlalchhuangi, Biochemist, Nodal Officer, TrueNat Laboratory chuan TrueNat Lab bunfel anih theihna tura hmalak dante a sawifiah a. RNA Extractor 2 leh Analyser hmanga darkar khat vel chhunga test-te zawhfel hman theih beisei anih thute, hmun dang atanga lo hawte ni 5 hnuah sample laksak an nih thin thu leh Covid Care Centre a enkawl mek Covid-19 vei pahnihte tih loh sample lak thar reng rengte chu District Hospital TrueNat khawl hmanga enfiah vek tawh tur anih thu a sawi a. Loboratory Technician 4 zinga 2 te Volunteer an nih thu a sawi lang bawk.

Thla hmasa August Ni 26, 2020 khan Covid-19 veite phurhna tur Ambulance lian Tata Winger, a chhung Air Condition vek chu Mizoram sawrkar atangin District Hospital Champhai chuan a dawng a, Dialysis khawl thar pawh tunah hian hman tan a ni tawh bawk.

TrueNat khawl hman tanna hunah hian Dr.R.Lianmawia, CMO Champhai, Dr. Zatluanga DMS leh thawktu dangte, Dr. Lallawmkima, DIPRO bakah Media mite sawm an ni. Harsatna dang a awm a nih loh chuan nitin sample endik hna hi kalpui thei tura ruahman a ni.