117/2023-2024V

Champhai, the 15th April, 2023: Association of Surgeons of Mizoram (ASM), Association of Surgeons of India (ISA) leh Indian Society of Anaesthesiologists (ISA) te tangkawp chuan vawiin khan District Hospital Champhaiah a thlawna inzai runpui 'Free Surgical Camp' an buatsaih.

Free Surgical Camp hi ASM President Dr. Saia Chenkual leh Vice President Dr. ST Lalruatfela te chuan hovin, an vaiin Surgeon 11, Anesthesiologist 3 leh Supporting Staff dangte an tel thei a. Free Surgical Camp kaltlang hian damlo zai ngai major surgery mi 27 te hlawhtling taka zai an ni a, heng zinga 7 te hi naupang an ni. Champhai District-a tih ngai loh Laparoscopic Cholecystectomy (zai hawn ngai lova a verhna khawl hmanga Mît paih) chu a vawi khat nan hlawhtling taka tih a ni bawk.

Association of Surgeons of Mizoram (ASM) hi kum 2018 khan Association of Surgeons of India (ISA) North East Chapter hnuaia Branch pakhat ni tura din a ni a. Tun tum hi an pawl buatsaih Free Surgical Camp tum hnihna niin, nikum khan a tum khat nan Lunglei-ah an lo huaihawt tawh bawk a. Thingtlang lama cheng, miharsa zawk leh hmunpui pan remchang lo te inchhawp hnaia puih chu an tum ber a ni. An ruahman dan chuan Mizoram hmun hrang hrangah kum tin Free Surgical Camp tum khat zel buatsaih an tum a ni.

Nizan khan District Hospital Champhai Doctors' Lounge-ah seminar an buatsaih bawk a ni.

Champhai District mipui mai bakah hmun hran hran atanga District Hospital Champhai pantute tana hmun pui lam pan ngai lova Free Surgical Camp buatsaih a ni chu mipuite'n an hlut hle a. District Medical Superintendent Dr. Zatluanga leh a thawhpuite chuan District Hospital Champhaia Free Surgical Camp buatsaihtute chungah lawmthu an sawi a ni.