118/2023-2024
Aizawl, 16th April, 2023 : LAD Minister Pu K. Lalrinliana chuan Ngopa khaw mipuite chibai bukin, India ram puma Village Council (Gram Panchayat) tha bera thlan an nih avanga lawmpuina thu a hlan.
Pu Rintea hian vawiin khan lawmpuina thuchhuah siamin Mizoram mai ni lo, India ram pumpuia Village Council nuai hnih singnga chuang zinga tehfung hrang hranga teh hnua Village Council tha ber an ni thei hi Mizoram-in a chhuang tak zet tih a sawi a.
India ram state kilkhawr ber, Panchayati Raj Institution hman ve lohna-ah Ngopa khua, khawtlang mipui inlungrual leh thawkrim, khawtlang hruaitu tha leh a ngaihna hria an awm chu India ram puma Mizoram hmel lanna, kan mawina an ni tih a sawi a. He lawmman dawn theihna atana mipui leh khawtlang hruaitute, Lengteng bialtu MLA Pu L Thangmawia te, Ngopa leh Saitual District -a sawrkar hnathawkte, LAD hnuaia thawktute zawng zawng thawhrimna kan chhuang hle a, hetianga thawhhona tha kan nei hi a lawmawm hle a ni, a ti.
India sawrkar-in Localization of Sustainable Development - khawtlang atanga hmasawnna ngelnghet, na takin a kalpui tanna atangin kum khat a lo tling ve ta tih tarlangin, he hmalakna bultan khuhhawnna New Delhi a nikuma neihah Mizoram-in theihtawp kan chhuah tur thu a lo tlangaupui tawh thu sawiin, Mizoram chu kan khawtlang mipuiin an zir avangin hlawhtling thei ber tur kan nih thu a lo sawi tawh tih minister hian a thuchhuahah a tarlang a. Hemi hlawhtlinna tura Ngopa khua thahnngaihna nen an lo pen chhuak leh, kum khatna-ah a hlawhtlinna hmahruai kan hmu thei nghal hi a ropui hle a ni, a ti a. He lawmman dawn atang hian nasa leh zuala hma in sawn ka ring a, kum dangah pawh lawmman tha tak in dawn leh theih nan duhsakna ka hlan a che u, a ti.
Minister chuan Ngopa khuain he hlawhtlinna an chang hian Mizoram khaw dang pawh a tiphur hle ni a a hriat thu sawiin, anni pawhin lawmman tha tak an dawn theihna tura an hmalakna leh inbuatsaihna-ah duhsakna a hlan zui a ni.
