119/2023-2024

India ram pum huap Gram Panchayat (Village Council) hna thawk thate inelna neih zawh takah Ngopa Village Council, Saitual District, Mizoram chuan Nanaji Deshmukh Sarvottam Panchayat Satat Vikas Puraskar (NDSPSVP) lawmman pakhatna an dawng a, India ram President Pi Droupadi Murmu hnen atangin lawmman hi vawiin Dt.17.04.2023 hian New Delhi ah an dawng a ni. India ramah Gram Panchayat 255000 aia tam mah an awm a, chung zingah chuan Ngopa Village Council hian India ram pum huap lawmman pakhatna an dawng a ni.

Lawmman hian thuziak mawi leh pawisa fai Rs.1,50,00,000/- (Cheng nuai za leh sawmnga) a keng a. Lawmman semna hmun hi Plenary Hall, Vigyan Bhawan, New Delhi ah niin lawmman semna Programme ah hian Central Sawrkarin an sawm angin Pu K.Lalrinliana, Hon’ble Minister, Local Administration Department pawh a tel a. Tin, Minister hi Local Administration Department hotu ten an tawiawm bawk a ni.

Ngopa Village Council in lawmman an lak ‘Nanaji Deshmukh Sarvottam Panchayat Satat Vikas Puraskar’ hi Sustainable Development Goals 17 te tihthlawhtinna tura Localization of Sustainable Development Goals Theme (thupui) hrang hrang pakua (9) pumpuia ti tha lawmman a ni a. Localization of Sustainable Development Goals (LSDGs) Theme 9 te chu hengte hi an ni-

1. Poverty Free & Enhanced Livelihood
2. Healthy Panchayat
3. Child Friendly Panchayat
4. Water Sufficient Panchayat
5. Clean and Green Panchayat
6. Self Sufficient Infrastructure
7. Socially Secured Panchayat
8. Panchayat with Good Governance
9. Women Friendly Panchayat.

National Panchayat Awards lawmman semna programme Delhi a neihah hian Pu K.Lalrinliana, Hon’ble Minister, Local Administration Department chuan Sustainable Development Goals chungchanga State Sawrkar hmathlir (Vision 2030) leh chumi tihlawhtling tura hmalakna hrang hrang te sawiin Mizoram in lawmman ropui tak a lak avangin Central Sawrkar hnenah pawh lawmthu a sawi a ni.

Village Council te enkawltu ber (Nodal Department) ‘Local Administration Department’ chuan Ngopa Village Council ten India ram pum huap a Localization of Sustainable Development Goals Theme pakua (9) tihlawhtling tura hmala tha lawmman pakhatna an lak theih nana Rural Development Department leh line Department dangte nena thawhhona tha tak an neih avangin lawmawm a ti hle.