No.2555/2021-2022
Aizawl Khuangchawi thla ni 11, 2021: Vawiin khan Lawngtlai District Mental Health Programme (DMHP) huaihawtin District Hospital Lawngtlaiah World Mental Health Day 2021 pualin hun hman a ni.

Kum tin October ni 10 hi World Mental Health Day atan hman thin niin, kumin hian Pathianni a nih avangin vawiin khan hman a ni a. Kumin thupui atan "Khawvel nunphung inchen lo takah rilru lam hriseln (Mental Health in an Unequal World)" tih hman a ni.

He huna thu sawitu, District Medical Superintendent Dr Zothanpari Chhakchhuak chuan mi thiamte'an zir chianna atangin mi pasarih (7) kal khawm zingah mi pakhat (1) zelin rilru lama harsatna nei nia chhut a nih thu sawiin, rilru lam harsatna neih chu thil zahthlak a ni lo va, natna dang ang bawka enkawl dam theih a ni, a ti a. Ni tin nunah rilru hriselna ngaih pawimawh a tul thu leh rilru hrisel nei tura taksa vawn uluk a tul thu sawiin, rilru lama harsatna nei an hriat chuan mi thiamte pan vat tura thurawn pe turin kal khawmte chu a chah a ni.

Vawiin hun hman hi DMHP in-charge Medical Officer Dr Richard Lalrinmawia Ralte chuan a kaihruai a. DMHP-a Psychiatric Social Worker Pi Vanlalruati'n report a pe bawk.

Lawngtlai DMHP hi October, 2016 khan tan a ni a. A din tirh atanga September, 2021 thleng khan damlo mi 2,467 an enkawl tawh a ni.

Attachment

  • Loading attachment...