No.2584/2021-2022
Aizawl13th Oct. 2021 : Prime Minister's Citizen Assistance and Relief in Emergency Situations (PM-CARES) Fund atanga District Hospital Lungleia bun, minute khat chhunga oxygen litre 1000 siam chhuak thei, Pressure Swing Adsorption (PSA) Oxygen Plant chu vawiin khan Dr. K. Pachhunga, MLA, Vice Chairman, Bamboo Development Board chuan a hawng.

Hawnna inkhawm Doctors' Seminar Hall a neih hi Lunglei Civil Hospital Medical Superintendent Dr. SR. Ngurchamlianan a kaihruai a, he huna khuallian Dr. K Pachhunga chuan thu sawiin tun hma ngaihtuah chuan hriselna enkawl kawngah Mizoram chuan hma a sawn thu swiin sawrkar laipui hmalakna PM Cares Fund atanga Mizoram District hrang hranga Oxygen Plant bun a ni chu hmasawnna a nih thu sawiin Lungleiah ngei pawh Oxygen Plant awmsa let nga zeta lian bun theih a ni chu Lunglei mipui tan a thlamuanthlak thu a sawi a a ni.

Dr. K. Pachhunga chuan Lunglei DC hmalaknaa CSR kaltlangin hriselna kawnga hmasawnna hmanrua cheng nuai 200 chuang man hmuh a ni tawh chu mipui tan malsawmna a nih thu sawiin tunah pawh Oxygen-a chhim lam chawm thei tur khawl lian Southern Oxygen Generating and Refilling Plant chu Lungleiah bun hna thawh tan mek a nih thu a sawi a, hei hian chhim lam mipuite Oxygen-a intodelh a, hniang hnar zawka mipui tan hman theih thuai a nih a beisei thu a sawi bawk a ni.

Lunglei Bawrhsap Pu Kulothungan A pawhin hrileng karah damlote hmakhua ngaihtuaha sawrkarin Oxygen Plant a bun sak chu mipui ten tangkai taka an hman a duh thu sawiin hun lo la kal leh zel turah pawh thawh hona tha nen hriselna lama hmasawnna kawngah theihtawp chhuah tlan a pawimawh thu a sawi bawk a ni.

Lunglei Civil Hospital Medical Superintendent Dr. SR. Ngurchamlianan report-a a tarlan danin tun tuma PSA Oxygen Plant hawn tak chu minute khata Oxygen Litre 1000 siam chhuak thei a nih thu sawiin Lunglei Civil Hospitala dam lo zawng zawngte pawhin a tul hunah hnianghnar taka an hman theih tur a nih thu a sawi a ni.

He hun hi Lunglei Chief Medical Officer Pu L.C. Liana'n lawmthu sawiin a khar a ni.