No.2583/2021-2022
Aizawl, Khuangchawi thla ni 13, 2021: Mizoram Youth Commission (MYC)-in thalai, phai lama hna thawka awm, COVID-19 hri leng vanga Mizorama lo haw, hna thawh tur mamawhte'n eizawnna an neih theih nana thiam thil chi hrang hrang zirtirna (training) a ruahman zinga pakhat, MYC, Medhavi Foundation leh Lawngtlai District Skill Committee te tang hovin an huaihawt ni 10 awh tur cake baking training chu vawiin khan Lawngtlai District tan Lawngtlai AOC Veng YLA Hall-ah tan a ni.

Training hawnna hun tawi buatsaiha Khuallian, Lawngtlai Bawrhsap Dr Andrew H. Vanlaldika chuan Lawngtlai District thalaite tan cake ur zirna training buatsaih theih a ni ta chu lawmawm a tih thu sawiin, cake chu vantlang nunphung leh khawsaknaa thil bet tel tlat pakhat a nih tawh avangin a ur thiamte tan eizawnna kawng zau tak a inhawng tih a sawi a. Training tura thlante chu taima tak leh tihtak zeta zir tura fuihin, teirei peihna nena hlawhtlin tuma bei turin a chah a. KMMTTP kawngpui beh chhana chhim lam tana sumdawnna kawng inhawng tur chhawrtu nih tum tur leh rinawmnain malsawmna a keng tel tih vawng reng turin a chah bawk.

Training hawnna hun hi Lawngtlai Additional Deputy Commissioner Pu James Miahlung chuan kaihruaiin, Lawngtlai DRDA Project Director Pi Marilyn Rualzakhumthangi'n inlawmna thu a sawi a. District Industries Centre-a Functional Manager Pu C. Dokulha'n report a pe bawk.

He cake baking training tur hian mi 20 thlan chhuah an ni a. Medhavi Foundation te'n training hi an pe dawn a ni.