Vawiin khan Serchhip District Immunization Task Force Committee chu an Chairman Pi Sangchhin Chinzah, District Bawrhsap ni bawk hovin a Office Chamber ah an thukhawm a. Kum thar January thla lai hawl atanga Measles & Rubella (Sentut leh Thaksip) Vaccine pek beihpui thlak dan tur an rel.
Chairman Pi Sangchhin Chinzah chuan, kan tu kan fate an lo hrisel a, thangthar hrisel zawk leh nuam zawk kan din theih nan sawrkarin Vaccine tha tak tak a siamin a pe thin a. Sentut Vaccine pawh hun rei tak atanga kalpui thin tawh a ni. Amaherawh chu, tun tuma Vaccine pek tur erawh hi chu a chi thar leh tha zawk, Sentut chauh nilo, Thaksip chi dang hrim hrim laka invenna tur a nih avangin a pawimawh zual a. Kan District chhunga nausen thla 9 atanga thalai kum 15 inkar zawng zawngin kokim taka an lak ngei tur a ni, a ti a. A lo turten kim taka an lak theih nan District chhunga cheng zawng zawngte thawhpuiah a sawm a ni.
He Vaccine hi January ni 18, 2018 atanga pek tana ni 30 chhunga District chhunga nausen thla 9 atanga kum 15 inkar zawng zawngte pek vek tur a ni a. A tir hapta hnih chhung chu zirna in zawng zawngah pek tur niin, a dawt hapta hnih chhung chu vantlang/khawtlangah kalpui a ni ang a. A tawp hapta khatah chuan a thual nawnna neih tur a ni ang.
He Vaccine pekna tur atana thawktute inbuatsaihna pawh vawiin atanga kalpui tan nghal niin, Training leh Workshop te, Sensitization Programme te pawh a rang lama buatsaih chhoh nghal a ni dawn a ni.
Vawiina Meetingah hian District chhunga Health Deparment Office hrang hranga Officer te, Education Department leh Social Welfare Department lam hotute leh member dang te an tel tha hle ani.
India ram chu Zeng natna awm tawhlohna ramah WHO in a puan hnuin; sawrkar laipui chuan Sentut leh a kaihhnawih Thaksip pawh kum 2020 hmaa umbo tumin tan a la chho leh mek a. Sentut natna hi naupangte tana thihna thlen theitu natna hlauhawm, kum 2015 chhunga khawvel puma naupang 1,34,000 te nunna suat tu, India ram bikah pawh naupang 47,000 zet te thihna thlentu natna a nih avangin he natna laka kan him theih nana thahnem ngai taka vaccine kan lak hi a tul tak zet a ni.
