Vawiin khan Directorate of Economics & Statistics hmalakna in kolasib DC Conference Hall ah ni 2 awh tur Vision 2030 leh Official Statistics chungchangah inhrilhhriatna (Sensitization) workshop neih a ni.
He workshop ah hian Kolasib Bawrhsap Pu R. Zarzosanga chu khuallian niin a hawng a, Khuallian chuan tunlai khawvel hmasawn zel ah Statistics dik leh rintlak a pawimawh thu sawiin Department hrang hrang ina an mahni Department kaihhnawiha Data/Statistics in anglo/inperhsan an siam hian hnathawhna leh plan siamna kawngah harsatna tamtak a thlen thin a ni a ti. Sawrkar tana State level Action Plan felfai tak leh rintlak tak nei tur chuan Database rintlak a pawimawh thu a sawi a, he huna kalkhawm Statistics lam kaihhnawih Sawrkar hnathawkte chu Workshop hlawhtling leh hlawkpui taka chhim turin duhsakna a hlan a ni.
He hunah hian Pu Lalchhuanawma Hrahsel , Director Economics and Statistics Department chuan Vision 2030 chungchangah presentation a pe a. Vision 2030 Workshop chu Sawrkar Laipui hnuaia body 1 NITI Aayog hmalakna hnuaia India ram chhunga State zawng zawngte tana State vision siam vek tur thupekna hnuaia neih a nih thu a sawi a, kum 2030 a Mizoram in a target thlen tum chu State vision Document a siam tur a nih thu a sawi. 3-7-15 Formula (3 years Action Plan, 7 Years Strategy, 15 years Vision) hmanga siam tur niin hei hi Mizoram Sawrkar hnuaia Department hrang hrangin plan /vision Document an lo siam chu Planning & Programme Implementation Department leh Economics & Statistics Department tangkawp chuan lo khaikhawmin chu chu State Vision Document atan an lo buatsaih dawn a ni. Pu Lalchhuanawma chuan Sawrkar Statistic felfai leh rintlak siamna kawnga chona(challenges) hrang hrang awm te sawiin, thiamna lama tlakchhamna (skill gap), a hun taka data peihfel, hnathawhna hmanrua leh hmunhma (physical environment) leh Official Data rintlak leh zual zawk neih te ani a, hemi bakah hian hmathlir (vision) leh hmalak chhoh dan tur te a sawi a chung zingah chuan Data thar ber khawnkhawm thin (Consistent data Collection), Data khawnkhawm na a kalphung felfai tak leh rintlak tak neih , Official Data rintlak nei turin Department hrang hrang leh Data chhawrtu/thlirtu te inkara thawhhona tha neih te an ni a, Official Data/Statistics chu a hun taka peihfel leh Mipui te tana belhchian tlak leh rintlak a nih thei nana hmalak chho tum anih thu a sawi bawk a ni. Heng chona leh hmathlir te bawhzuia hmalak dan tur te chu resource person hrang hrangin thupui hrang hrang hmangin zirtirna an pe a ni.
He hun hi Pu lalbiaksanga, Jt. Director Eco & Stats Department chuan a kaihruai a,Mizoram District 8 atangin District Research Officer, Research Officer (Directorate), Statistical Inpector leh Sub Inspector te an tel tha hle a, naktuka neih chhunzawm tur a ni.
