4234/2025-2026

Aizawl dated 30th January 2026: Vawiin khan Directorate of Information & Public Relations chuan Sawrkar Flagship Scheme ‘Bana Kaih Scheme’ chungchang mipui hnena uar zawka zirtirna kalpui dan tur leh he scheme hnuaia hlawhtlinna changte, media kaltlanga puanzar hna kalpui dan tur inzirtirna hun,’ Publicity & Documentation Workshop on Bana Kaih Scheme Phase ii’ a buatsaih a. He hun hi Pu Hmingthanzuala, IPRO chuan a kaihruai a, Pi Emily Lalrinpuii Sailo, Deputy Director & Nodal Officer chuan kalkhawmte lawmna thu sawiin District tin a DIPRO leh AVPA-te he hunah hian an tel a ni.

Publicity & Documentation Workshop on Bana Kaih Scheme-ah hian Pi Emily Lalrinpuii Sailo, Deputy Director & Nodal Officer chuan Bana Kaih Scheme chu ram hmasawnna tura thalai thiamna leh theihna nei ten tangkai taka an chhawr theih nan, media kaltlangin an hriattur pawimawh hrang hrangte puanzar thin a pawimawh thu a sawi a. He scheme hlawhtlinna tur hian Media leh a kaihhnawih hrang hrang buaipuitu, I&PR Directorate-a thawktute leh District-a DIPRO-te an pawimawh thu sawiin, Implementing Department nen a thawhhona tha neih a tul thu a sawi bawk a ni.

Pu Hmingthanzuala, Asst. Nodal Officer chuan Bana Kaih Scheme Phase -I chhunga publicity kalpui dan thlirletna hun hmangin, Phase -I kalpui chhunga Loan Component leh CM Special package dawngtute hmalakna enpui zung zung a tul thu a sawi a. Bana Kaih Scheme hnuaia thlai ‘support price’ pekte chu February leh March chhunga seng leh tihral a hun chhoh leh dawn avangin ‘Publicity & Documentation’ tha taka kalpui a nih theih nan inpuahchah tan a pawimawh thu a sawi bawk a ni.

Vawiin ‘Publicity & Documentation Workshop on Bana Kaih Scheme’ buatsaihah hian District tin atangin District Information & Public Relations Officer-ten an district enkawl theuh a mipuite hnen a Bana Kaih Scheme zirtirna an lo kalpui tawh dan leh an kalpui chhunzawm dan tur, ’Publicity Plan’-te en ho a ni a. Phase-i Ieh ii a Progress partner thlanchhuahte hmalakna, a hmun ah ngei enpuia Documentation tih dan turte sawi ho a ni.

Pi Mina Zoliani, Joint Director chuan District I&PR Officer-te thawhrimna leh an hnaa an inpekna chu fakawm a tih thu a sawi a. Bana Kaih Scheme chu ram tihhmasawnna tura theihna neite thuam chak lehzualna tur, Mizoram Sawrkar Falgship Scheme a nih angin Sawrkar hnathawk kan nihna zawn atang pawhin ngaih pawimawh hmasaka nei zel turin kalkhawmte a fuih a. Pu Pratap Chhetri, Deputy Director chuan lawmthu sawina hun a hmang bawk a ni.