District Institute of Education and Training Aizawl chuan November 20 leh 21 chhung hian an Auditorium-ah Aizawl khawpui chhung High School leh Higher Secondary School Lecturer te tan ‘Prevention of Drug Abuse in Educational Institutions‘ tih training a buatsaih a.
He training hi vawiin chawhma dar 11 khan Pu Lalnuntluanga Hnamte, Principal DIET in a hawng a. Principal chuan Chief Minister thahnemngaihna leh hmalakna a din “State Level Committee on Prevention of Drug Abuse in Educational Institutions,” tih hlawhtlin a ni chho chu lawmawm a tih thu leh training hlawk thlak tak anih tur thu a sawi a ni.
He training a Resource Persons te chu Pi Lalromawii Lailung leh Pi Biaklalzawmliani Lecturers DIET Aizawl-te anni. Resource Persons-te kaihhruaina hnuaiah hian Dr C.Lalhrekima, Head of Department, Department of Psychiatry, Civil Hospital leh Dr. Ruth Lalmuanpuii, Medical officer, Civil Hospital Aizawl-te thuziakte zirhoin naktukah HSS Lecturer ten an chhunzawm ve leh ang.
He training hi Mizoram Chief Minister Pu Lal Thanhawla Chairman-na hnuaia din, “State Level Committee on Drug Abuse” thurel bawhzuina kal zel a hmalakna niin DIET Aizawl hian an District chhunga Middle School, High School leh Higher Secondary School bakah zirlai nu leh pa te tan a hranin training ala buatsaih chhunzawm dawn a ni.
DIET Aizawl-ah kumin a training bei mek zirtirtu nih tum PSTE final Yr Batch 16-na te chu an zirlaiin a phut angin Central Institute of Hindi (CIH) Agra-ah Refresher Course an nei mek a, he Study Tour hi Rosiamliana Ralte Vice Principal, Laldinmawii leh Cathy Rohlupuii Instructress ten an hruai a, Nov ni 24-28 chhung hian Zirtirtu nilai training mek P/S leh M/S ten Half-yearly Exam an nei anga Dec ni 2 atangin PSTE Final Yr leh PSTE First Semester ten Board Exam an tan ang. DIET Aizawl ah hian thawktu Faculty-Principal tiamin 25, Office Staff- Superintendent hovin 27 leh DIET Practising School Headmaster tiamin mi 15 an vaiin 67 an awm a,training mek Middle Section 128, Primary Section 123, PSTE First Semester 107 leh PSTE final Yr batch 16-na 85, an vaiin 443 an awm mek bawk a ni.
