Pu C. Kamlova, Mualpui Salem Veng lehkhabu ziah ‘Tawnhriat thler hnih’ chu vawiin chhun dar 1:00 khan I & PR Conference Hall-ah Pu C. Ngunlianchunga, AH & Vety Minister in a tlangzarh.

Nepali tawnga Pu C. Kamlova, MA, M.Ed lehkhabu ziah ‘Anubhavka Dui Phant’ India hian kum 2003 – 2004 khan chawimawina ‘Bhasha  Samnam’ award a lo dawng tawh a, Mizo tawngin ‘Tawnhriat thler hnih’ tiin lehlin a ni.

Mahni tawng pawh ni lo, Nepali tawnga thu leh hla siam thei, award hial dawngtu Pu C. Kamlova hi a fakawmin a ril hle a ni tiin Pu C. Ngunlianchunga chuan Pathian malsawmna a dawng nasa in a thawkrim hle tih a hriat, a ti a. Lehkhabu dang tam tak pawh a siam thu leh Nepali aia Nepali tawng thiam zawka a hriat thu sawi bawkin tawp mai lova thu leh hla ziak leh siam ah tanla zel tura ngenin duhsakna a hlan a. Mi tam takin an sawifiah theih mai loh Pathian thu te, hnam ngaih hla leh zahna te, Mizo mai nilo, India ram chawimawina hla a phuah leh siamte chu hlu a tih thu sawiin Minister chuan ‘Tawnhriat thler hnihna’ chu midangte tana tangkai tak a nih beiseina nen a tlangzarh a ni.

Pu C. Kamlova lehkhabu ziah tha tak takte chu a bu a siam a lo ni ta chu lawmawm a tih thu sawiin programme kaihruaitu leh publisher nibawk Pu MC Awia chuan Nepali Christian rawngbawlna ah pawh Pu C. Kamlova chu thawh hlawk tak a nih thu a sawi.