No.3330/2021-2022

Aizawl the 9th, December' 2021: Nimin tlai khan District khawpui fai inelna endiktu Team chuan Lunglei lo thlengin faina leh thianghlimna kawnga Lunglei khawpui hmalakna te an endik. Endik tu team te hi Pu Ralthuama, Deputy Director, (TP), UD&PA Department, Pi Casey Lalnunsangi, Scientific Assistant, MPCB leh Pu Roneihthanga, Finance Secretary CYMA te an ni.

Lunglei Convention Centre Conference Hall ah dawnsawnna hi neih niin Pu M. Misael, Addl. Deputy Commissioner leh Chairman Town Sanitation Task Force, Lunglei ni bawk chuan endik tute lawmna hun hi a kaihhruai a, Lunglei khawpui fai kan lo ni tawh a, kan khawlai dinhmun enin beiseina kan nei sang a, VC kaihhruaiin NGO, YMA leh Nu leh Pa te an tang a, a lawmawm hle a ni a ti. Faina hi kan ram in a la zir lova, kum 20 hnu lamah chuan inelna pawh neih a ngai tawh lovang a ti. Faina nena kalkawp tlat chu hriselna hi a ni a, ram leh khawpui a fai chuan a chhunga cheng mihring te chu an hrisel in an damrei thin a ni a ti. Kum 1940 aiin tunah chuan kan dinhmun a sang tawh hle a ni tiin faina hi chak tak a kalpui angaih thu a sawi bawk.

Pi Vanthangpuii, DUDO, UD&PA Department chuan faina lama hmalak dan leh Lunglei khawpui dinhmun a lem nena entirin sawifiah a. Vantlang inthiarna hmun 30 ah siam a nih thu te, vantlang hmun a bawlhhlawh a awm loh nan bawlhhlawh bawm dah anih thu te, bawlhhlawh sawngbawl dan chungchanga hmalak dan te,hmun lun laite nikhatah vawi hnih phiahfai a nih thu te, Lunglei khawpui chhunga Village Council 24 awm ah VC 8 ah UD&PA Department motor in bawlhhlawh an khawn thin a, a VC 16 ten bawlhhlawh paih nan motor an in tum thu a sawi a ni. Lunglei khawpui chhungah kum 2021 chhungin Lunglei Town Sanitation Task Force hmalaknain hnatlang vawi 70 neih a ni a, Auto Rickhaw Stand 14 ah bawlhhlawm bawm 28 dah anih thu a tarlang bawk. Faina Hapta 2021 hman chhung hian Hotel, School, Veng fai (General leh Commarcial), Hospital, Sorkar Office fai thlanna neih a ni.

Vawiin khan Lunglei khawpui fai endiktu team te hian veng hrang hrang faina dinhmun an en a ni.