Vawiin hian Lawngtlai District Legal Service Authority bul tumin LADC Conference Hall ah Lawngtlai District chhunga Dan kengkawhtu pathumte kalphung leh nihphung chungchang sawihona leh inrawn khawmna hun buatsaih a ni a, LADC, CADC leh State hnuaia thawktuten hun an hmang a ni.

He inrawn khawmna hun, Pu H. Lalruatkima, President & Recorder, District Council Court, LADC kaihhruaiah hian Pu H. Chhuanawma, EM, LADC chuan inlawmna thu a sawi a, chu mi hnuah Pu Laldinpuia Tlau, MJS, Chief Judicial Magistrate leh DLSA Member Secretary ni bawk chuan Lawngtlai District chhunga Dan hmanga rorelna kalpui dan, State leh District Councils pahnih LADC leh CADC te chanpual leh an tihtheih chin theuhte sawifiahna a nei a, chumi hnuah Pu Lalchhankima, Judicial Officer, LADC chuan ‘The Pawi Autonomous District Council (Marriage and Divorce) Act, 1980’ chungchang sawiin hun a hmang ve bawk.

Mithiam pahnihten thu an sawi zawh hian heng an thusawi behchhan hian sawihona hun hman zui nghal a ni a, kalkhawm te zinga a duh apiangin an lo tawn tawh leh hmabak awm nia an hriatte an sawi hlawm a ni.