Vawiin hian Minister of State for AH & Vety etc., Pu C. Ngunlianchunga chuan Lai Women Association (LWA) General Conference vawi 13 na, Central YLA Hall Lawngtlaia hman naah khuallian niin a telpui a, tukin zing dar 7:00 a.m khan Lai Women Association General Headquarters Office thar, Lawngtlai Electric Venga sak chu a hawng bawk.

General Conference hmangtute hmaah Pu C. Ngunlianchunga chuan, hnam leh ram hringtute chu nute an ni a, mihringte hian kan mihring pui vekte hnena kan leibat hi rul vek dawn tai la, kan nute laka kan leibat hi rulh a huphurhawm be r ang, a ti a. Lai nuho inpawl khawm an nih ang ngei a Pathian in a pek, Lai hnam leh Lai ziate zahpuilova chhawm nung zel turin a fuih a ni. Nu in nau a pai chuan hrin ni a nei thin ang hian kan nuten ram leh hnam tana thiltha an pai chuan hrin ni a awm nge nge thin a, ram leh hnam tana thil tha hring a, ram tana fa duhawm tak tak leh chhenfakawm tak tak hrin tum tlat reng turin a ngen a ni.

Minister hian LWA Conference hmangtu nu, kum 70 leh a chunglam mi 15 te hnenah thilpek a hlan a, LWA General Headquarters Office a hman tur Computer Set leh Xerox cum Printer a pe bawk. General Conference hi Pi H. Vanlalhruaii, President, LWA in a kaihruaia, Pu VL Hmuaka, CEM, LADC chu khuallian a ni bawk. Khawmpui hi naktukah pawh neih chhunzawm tur a ni ang.

Pu C. Ngunlianchunga hian tukin vek khan LWA General Headquarters Office thar a hawng bawk a, a hawnna inkhawm tawiah Minister hian, Lai Women Association din a nih tirh atanga vawiin thlenga nung taka lo kaihruai reng thintute a ngaihsan thu sawiin a theihna apianga tanpui zel a inhuam thu a sawi bawk. He inkhawm ah hian Minister nupui Pi KR Rochhingpuii, Sr. Vice President, LWA General Headquarters ni bawk pawhin thusawina a nei ve bawk.