786/2024-2025

Khawzawl 12th June, 2024 : Samagra Shiksha, Khawzawl District bultumin vawiin chawhma dar 10:30 khan Electric veng YMA Hall-ah District Level 32nd Children's Science Congress 2024 neih tur pualin Sensitization Workshop buatsaih a ni a, hetah hian Khawzawl District chhunga Middle School leh High School hrang hrang aiawhte an tel a ni.

Vawiin Workshop hi Dy. DPC K. Thantluanga'n a kaihruai a. DPC, DEO ni bawk Pi R. Laltanpuii'n thu sawiin vawiina Sensitization Workshop buatsaih a ni chu lawmawm a tih thu leh zirlaite thiamna hai chhuahpui thei turin zirtirtuten kan tuipui a ngai a ni a ti a. Naupangte hi luipui fawn bulh bulh a lawng mahni a awm ang kartu nei lo ang an ni a, kartu an neih chuan vaukamah an kai thei a. Zirtirtute hian kan zirlaite kan kar thiam a, kan kar that chuan vaukam kan thlenpui thin a. Subject tinah kan zirlaiten hlawhtlinna an neih a, HSLC-ah te hlawhtlinna an neih theihna turin zirtirtute hian theihtawp kan chhuah a ngai a ni a ti. Science Congress lo awm turah hian naupangte a tam thei ang ber tel tum ila, Theme hrang hrang hman tum ila tiin Workshop a an thil zir turte chu an zirlaiten hlawk taka an hmanpui theihna turin Workshop a tel zirtirtute chu an thil zir hriatchian tum turin a fuih nghal bawk.

DEO in thu a sawi zawh hian Resource Person Dr. Laldinpuia, Associate Professor, Centre for Disaster Management, MZU in zirtirna a pe zui nghal a ni.

Vawiin Workshop-ah hian Organising Secretary Pu Jehovajire-a'n Report a pe a, a tarlan danin nikum khan Children's Science Congress hi Govt. High School, Khawzawlah neih niin Junior-ah Team 9 leh Senior-ah Team 11 an tel a, zirlai 39 an tel a ni. District aiawh a State intihsiaknaa tel turin Project 7 thlan a ni bawk. Kuminah hian October ni 7-11 chhungin Children's Science Congress hi Khawzawlah buatsaih a ni dawn a ni.