787/2024-2025

Champhai, the 12th June, 2024: Adviser to CM (Technical) Er. H. Ginzalala chuan Champhai Zote chu Champhai khawpui huamchhunga awm, khawpui tana nitin mamawh thenkhat phuhru tura theihna nei a ni, a ti a. Champhai North bial chhunga khaw hrang hrangte tana hmalakna tur project design siamah Zote khua chu Veterinary & Animal Husbandry Sector lama hmalak nana ruahman a nih thu a sawi a. Khawpui chawmtu tur Bawnghnute thar chhuah leh ran chaw Hybrid Super Napier, protein % sang tak nei chinna hmun tura ruahman a nih thu a sawi a. Thil thar chhuah mai piah lamah a sawngbawlna thlenga ngaihtuah tel a tul thu a sawi a, ruhmanna siamte a hlawhtlin theih nan tanlak tlan a tul thu a sawi bawk.

Adviser to CM (Technical) tawiawmtu District Bawrhsap Pu James Lalrinchhana chuan Sawrkar policy leh hmalaknate hmasawnna tur a ni tih hriaa theihtawp chhuaha tawiawm turin District mipuite a sawm a. Champhai North hmasawn nana bialtu MLA in project tha tak tak a duante chu a tak ram thlentir tura tawiawm tlat a pawimawh thu a sawi a. Champhai District chhunga ram pahnihte insumdawntawnna tur Border Haat 3 siam turah Zote a tel thu a sawi bawk.

Pi R. Lalramhluni, DAO Champhai chuan Zote Tiau Zau-ah nikum atangin khawl hmanga buh phun (farm mechanisation) kalpui a nih thu a sawi a. Zote Tiau Zau-a kum tluana tui duhkhawp ang hmuh a nih theih nana Keilungliah tuikhuah atanga tuilak pawimawh dante a sawifiah a. Loneitute chu tih tak takna leh rinawmna nena thawk turin a fuih bawk.