788/2024-2025

Dated Aizawl, the 12th June, 2024: Vawiin khan MKVI Board Multi Disciplinary Training Centre (MDTC), Zemabawka course hrang hrang zir mek thalai mi 126 te bultanna (induction programme) buatsaih a ni a. Chief Minister Pu Lalduhoma chuan a telpui.

Thu a sawinaah Chief Minister chuan, kumtin thalai lehkhathiam an pung zel a, sawrkar hnaah an lut vek thei lova, sawrkar hna pawhin a daih seng lo. Chuvang chuan eizawnna dang kan dap a ngai a, ram pawna inhlawh emaw mahni rama mahni kutkawiha hmalak kan tum a nih pawhin skill kan neih a ngai thin. Chutiang skill engemaw kan neih theih nan chuan MKVI hian training a buatsaih thin a. Vawiinah thalai za chuangin in tuina lam nia in hriat in han zir tur hi ka lawmpui che u a ni. Thalai theihna nei, mahni kea din tuma bei ngam entreprenuer te chu kan sawrkar hian Bana Kaih Policy hmangin kan thawhpui dawn a, vawiina zirlai te pawhin chutiang mi chu rawn nih chu in tum theuh dawn nia.

Kan nitin mamawh thil engkim deuh thaw hi state pawn atanga kan lakluh a la ni a. Kan siam chhuah ve mai theih thil tam tak hi a awm. Chung thilte chu kan ngaihven bik a tulin ka hria. Tin, engemaw mipui mamawh kan siam thiam chuan e-commerce hmangin zau takin kan zuar thei tawh a, mite duhzawng siam chhuak thiam nih kha a pawimawh lai ber chu a ni. Mizo thalaite hian skill an nei tha em em a, tun hnai lawka National Skill Competition ah pawh lawmman an rawn hawn nual mai. International Competition a India aiawh zui tur te pawh kan nei hial. Nangmahnia awm theihna leh thiamna te haichhuaka, eizawn nana tling thiamna neih ngei in tum theuh dawn nia, tiin a chah a ni. Chief Minister hian trade thenkhat training zo tawh zinga a tithate hnenah certificate a hlan bawk.

Pu C. Lalremliana, Chairman, MKVI Board pawhin thusawiin, Chief Minister-in an training hmunhma te a hmuhpui chu an lawm hle tih a tarlang a. MKVI hmunhma leh bungrua tihchangtlunna hna hun reilote chhunga an thawh tlangpui te sawiin hma an sawn zelna tura ruahmanna an neih te a sawi a ni.

Induction inkhawm hi Pi Saikungi, CEO, MKVIB in a kaihruaia, Pu RC Rothuama, Executive Officer in hunserh hmangin, Pu Hmanhlunchhunga, Principal, MDTC chuan technical report a pe a ni.

MDTC hi training centre chauh ni lovin production centre a ni tel a, kum1987 a din a ni. Tunah Staff hi an vaiin 53 an awm a, fund hi KVIC atangin an dawng a, trade 11 ah training hi an kalpui thin. IIT Gauhati nena tangkawpin PMKVY training trade pathumah an kalpui tel bawk. Tun tum bikah hian a tirah mi 152 an inziak luta, an zir rei chhung a inan loh avangin tunah hian mi 126 an la awm mek a ni. MKVIB a din ata vawiin thlengin mi 4280 an lo training chhuak tawh.

He hunah hian Pu JK Dawngzuala, Chairman, ZIDCO, Pu Lalthazuala Royte, Chairman MIFCO, Pu Isaac Malsawma, Chairman, MAMCO, Pu Asish Modak, Director, MKVIC state Office leh sawrkar mi pawimawh engemawzat an tel a, Pu JH Lalbiakliana, Jt. CEO, MKVIB chuan lawmthu sawiin inkhawm a khar a ni.