789/2024-2025

Lunglei, the 12th June, 2024: Vawiin chawhnu dar 2:00 khan Convention Centre, Lungleiah Healthy Lunglei District Campaign Launching Programme hman a ni a, Health & Family Welfare Minister Pi Lalrinpuii chuan khuallian niin; campaign programme hi a tlangzarh a ni. Vawiin programme hi Lunglei District chhunga MLA pathum: Lunglei South bialtu Pu Lalramliana (Papuia), Thorang bialtu Er.R.Rohmingliana leh West Tuipui bialtu Pi Prova Chakma ten an telpui bawk.

Healthy Lunglei District Campaign Launching Programme hi Dr.L.C Liana  Sr.CMO, Lunglei in a kaihruaia, Rev F.Zorinkhuma Secretary MTKP in hunserh a hmang. Lunglei Bawrhsap Pi Ramdinliani chuan kalkhawmte lawmna thu sawiin, Lunglei Bawrhsap a nih chhung (kum 1 leh thla li) in inthlan chi hrang hrang vawithum lai buaipui a nih avangin duh anga District hmasawnna tura hmalakna pawh a harsat thu leh inthlan buaipui angaih tawh loh avangin District hmasawnna tura nasa zawka hmalak a theih tawh tur thu leh hetiang a nih laia Lunglei District mipuite kan hrisel zawkna tura Sawrkar hotute hmalakna avanga ruahmanna lian tak a awm chu lawmawm a tih thu leh he Programme hi a hlawhtlin theihna turin atchilh pawl awm angai a, department thawktute leh mipuite pawhin theihtawp kan chhuah angai a ni, a ti. Lunglei District hi kan hrisel lo bik a nilo a kan hrisel leh zualna tura ruahmanna siam a ni hi tangkai taka kan hman angai a, hrisel pawh kan tum angai a ni tiin; he hun ngaipawimawh a tel zawng zawngte hnenah lawmthu thu a sawi a ni.

Khuallian leh Programme hawngtu Health Minister Pi Lalrinpuii chuan Healthy Lunglei District Programme ngaihtuah chhuaktu Lunglei District Bawrhsap leh a thawhpuite ngaihtuahna leh remhriatna chu fakawm a tih thu a sawi a, he Programme ti hlawhtling tur hian mitin ten ei leh inah kan inthunun a tul bakah taksa sawizawi kan ngaipawimawh a ngai a ni tiin, Healthy Lunglei District Programme chu mipuiten tangkai taka an hmana an hlawkpui ngei duhsakna nen a hawng a ni.

Vawiina he hun hmannaah hian Dr.Eric.Zomawia Mission Director, National Health Mission chuan Power Point Presentation hmangin Non Communicable Diseases (NCD) chungchang zirtirna a neih a. khawvela thihna 74% chu NCD vanga thi an ni a, India rama thihna zawng zawng 63% chu NCD vang a ni tih tarlangin, Lunglei District mipui ten NCD laka nunna hlu tak kan chan tawh loh nan kan nun dan phung thlak ngai lai leh tihtur leh tihloh(do’s & don’ts) tur te zirtirna chiangkuang takin a pe a ni.

He hunah hian Pu James. Miahlung Addl.D.C, Lunglei, Chairman Sub Committee on NDC Awareness Campaign & Screening Drive chuan report pein; Healthy Lunglei District Campaign atan ruahmanna an siam dan leh Committee buatsaih a nih dan te tarlangin sum awm lo chunga rinna a kalpui  a nih dan leh CSR atanga leh Lunglei District chhunga  MLA te atanga beisei an nei dan te a tarlang a, he hmalakna hi Lunglei khawpui chhungah kalpui nghal tur niin, August thla atangin thingtlang lamah pawh hmalakna kalpui a ni dawn a ti a, hriselna kawnga mipuite hnena taksa an enkawl dan zawhna hrang hrang an siam dan leh an chhanna te a tarlang bawk.

Vawiina Healthy Lunglei District Campaign hawnna pual  hian Convention Centre kawtzawlah a thlawna in entirna buatsaih nghal niin  mi thahnem takte hriselna dinhmun enfiah niin a thlawnin damdawi sem nghal a ni a, Launching Programme-ah hian Esther. Hnamte leh Lalenkawli Patu ten zaiin kalkhawmte an awi a, Dr.K.Lalhmachhuana District TB Officer & DACO in lawmthu sawiin hun a khar a ni.