4129/2024-2025

AIZAWL; the 7th February, 2025: Vawiin chawhma khan DC Conference Hall-ah District Level Committee on Fire Prevention (DLCFP), Aizawl District chuan kumin a Fire Prevention Week hman dan tur relin an meeting. Er.Lalhriatpuia IAS, Chairman  DLCFP leh Bawrhsap ni bawk chuan meeting hi kaihruaiin, Pu Lalnunsanga Khawlhring, IFS,Member Secretary leh  Divisional Forest Officer, (Aizawl Forest Division) ni bawk chuan nikum 2024-2025 chhunga Aizawl District chhunga kangmei chhuak tur venna(Fire Prevention Activities) kawnga hmalakna hrang hrang report a pe a. Report a tarlan danin nikum chhung khan Aizawl district chhungah vawi 354 ram kang report a ni a, ram kang huam zau zawng hi 787.58Ha a zau a ni. Kumin Fire Prevention Week thupui a tan “Ram tikang lo tura tan kan lak hian hma hun eng zawk kan insiam a ni” (We care for future if we care not to cause fire) tih hman a ni ang.

Vawiin meeting chuan Fire Prevention Week hawnna chu State Level Committee on Fire Prevention Committee in tahrik ni 10^th February-a Vana Pa Hall-a buatsaih dawn tho avangin, a hran a buatsaih lova, kokim taka Vana Pa a hawnna inkhawm chu tel vek turin a rel.

State Level meeting in March ni 15 aia tlai lova lo/huan hal vek tur leh Lengpui leh a chheh vela lo hal turte chuan tlai lam dar 3:30 hnu lamah chauh hal tur a tih chu a tul dan anga thupek chhuah a bawhzui turin a rel a.  State Level a rel tel lo, Aizawl district chhunga hmunphiah chinna hmun te chu 31^st March thleng phalsak tur leh thupek chhuah tul chhuah turin a rel bawk.

State Level a rel tawh angin, Kangmei ven kawnga hma la tha khua(Village)   thlan chhuah a, lawmman pek an ni ang. A thlanchhuahna kawnga mawhphurtu tur te ruat an ni bawk. District chhunga Awareness Campaign kalpui dan tur leh Ram tikangtu/ Kangmei tichhuaktu laka hremna chelek dan tur rel a ni bawk.