Vawiin khan District Level Committee On Green Mizoram chu D.C Conference Hall Mamit-ah Pu R.S Lalzamliana Addl DC kaihhruaina-in an thukhawm.
He meeting-ah hian Sub Committee on Green Mizoram thurel bawhzui dan tur te, Green Mizoram Day 2012 District chhunga hman dan tur te committee member tihdanglam leh ruat belh chungchangte, kum kalta lama Green Mizoram Day hman tawh dan leh he Programme hnuaia thing phun hlawhtlin dan enfiah chungchangte an rel a ni.
Pu Lallianzuala, Member Secretary DFO, Mamit report peka a lan danin Mizoram pumah Green Mizoram hnuaiah hian 1999-2011 chhung khan thingtiak 20,64,581 ( Nuai sawmhnih leh singruk chuang) zet phun a ni tawh a, Mamit District bikah chuan thingtiak 35,533 (Singthum Sangnga Zanga Sawmthum leh pathum) phun a ni tawh a ni. Mizoram District pariat zinga a phun tlem ber ni mah se an thing phun nun tam dan enin Mamit District chu Green Mizoram Programme tihklawhtling ber pawl District a nih thu a tarlang a ni.
He meeting hian State Level Sub Committee in a lo rel tawh angin Greeen Mizoram Day 2012 chu 14th June 2012 hian District Hqrs ah leh RD Block Hqrs leh Forest Division hmunah te hman turin a rel a, kum kalta lama an lo phun tawh enkawl zui hna leh Mamit leh Bairabi inkar kawngpui dung remchangah te Sorkar Department, Tlawmngai pawl leh Zirna in hrang hranga thawktu te leh zirlai ten thing phun ni se, tih te rel a ni bawk.
Meeting-ah hian members te an tel tha hle a ni.
