Vawiin chawhnu dar 2 khan Serchhip District DC Committee Room-ah District Level Coordination Committee Meeting neih a ni a, he Meeting hi Pu H. Darzika, Deputy Commissioner in kaihruaiin, Serchhip District chhunga sawrkar Department hrang hrang hotute an tel tha hle.

He meeting-ah hian Serchhip District huam chhunga department hrang hrangte hlawhtlinna leh hmachhawpte thlirin an sawi hova, District huapa hmalak ho a tulna thilte leh sawrkar nghawng tur thilte an sawi ho a ni.

Chairman Pu Darzika chuan sawrkar flagship programme NLUP a hlawhtlin theih nana theihpatawp chhuah lehzual turin NLUP khawih department hotute a ngen a. Tin tuna pawisa sem dan kalphung ang hian NLUP hmasa kha lo kalpui nisela chuan tuna kan dinhmun chu sang tak a ni tawh ang a ti a, kan officer tam tak, retheite chawikan tumna rilru tak tak neite rilru put hmang ka hmuh hian hlawhtlinna hi a beiseiawm tak zet tawh a ni a ti bawk.

He meeting-ah hian sawrkar khawih thil engemaw zat an sawi ho zingah Printing and Stationery Department depot atang chauha sawrkar-in stationery item lei tur a ti hi Aizawl pawn lam district-a department zawng zawngte tan harsatna a nih thu leh sawrkar sum pawh a hek zawk thu an sawi a. Hmun dang atanga lei dawnin Printing & Stationery Department NOC (No Objection Certificate) tel lovin Treasury-ah bill a tlang thei si lova, hei hian nasa takin OE bill chungchangah department zawng zawngte harsatna a thlen a ni tiin District pum huapin NOC ngai lova Govt. Approved Stationery Dealer kan neihte hnen atanga lei min phalsak tura sawrkar ngen nise tiin an rel a ni.