Vawiin chawhnu dar 2 khan Champhai District Fire Prevention Committee chu an Chairman leh Bawrhsap ni bawk Pu Vanlalngaihsaka IAS hovin an thukhawm a, Fire Prevention Week, 2018; February Ni 12 atanga 17 chhunga hman dan tur leh kumin thal chhova District chhunga ram kang a awm loh nana hmalak dan tur hrang hrangte an rel. Kumin bik atana thupui tur chu ‘ Ram tikanglo turin mitin fimkhur ang u” tih a ni.

Vawiin meeting chuna Fire Prevention Week District level-a urhsun taka hman nise a ti a. A hawnna chu College Multipurpose Hall-ah February ni 12 hian hman nise, Khuallian atan Champhai College Principal Pu Lalnunmawia chu sawm nise tih a ni a. Programme hman dan tur hrang hrangte duan a ni bawk . Kangmei chhuak tur ven nan huan lo ram nghet neite chu mumal taka mei kawng sial vek tur a tih leh Sawrkarin hun bituk a siam March ni 15 aia tlai lova lo hal vek tura tih nise ti a rel a ni a. Dan pawisa lo chungah na taka hremna lek kawh ngei nise ti a rel thluk a ni bawk a ni. YMA-te nena tang hovin khaw tinah Voluntary Fire Fighting Squad din nise, a tithate hnenah chawimawina hlan nise ti a rel a ni a. Heng bakah hian kangmei ven kawnga hriattur khawtin, zirnain leh Biakinah te chhiarchhuah tura chhawpchhuah nise tih a ni a. Kang mei ven kawnga thawk tha khua 3 hnenah lawmman sum fai hlan leh News paper thawh hlawk ber hnenah lawmman pek nise tiin meeting chuan a rel a. A thlang chhuak tur Sub-Committee pawh din nghal a ni a. Khawtina hmalakna hrang hrangte uluk leh ngun taka vil zel ni thin se ti a rel a ni bawk a ni.

He meeting ah hian Pu C. Lalbiaka, DFO Champhai, Member Secretary, Champhai District Fire Prevention Committee chuan ram kan chhan ber chu Lo hal vang anih thu tarlangin kumin bikah Satellite atanga a lan danin Champhai District chhungah Fire Incidence (Kangmei chhuak) tum li a thlen tawh thu a sawi a ni.

He meetingah hian District Level Committee member-te an tel tha hle a ni.