Vawiin tlai khan Aijal Club-ah Consultative Expert Committee Meeting on Cancer in Mizoram neih a ni a. Health Minister Pu Lal Thanzara chu Khuallian a ni. Health & Family Welfare Department leh Swasth Uttar Purv, Public Health Foundation of India (PHFI) tangkawp buatsaih niin Ministry of DoNER bultum a ni.
Khuallian chuan mi thiam tak tak kalkhawmte atang chuan hlawkna a awm ngei a beisei thu a sawi a. Heng mithiam finna leh hriatnate chu kan chhawr tangkai ngei dawn a ni, a ti a. Mizoramah cancer veite enkawlna Regional Care Centre (RCC) kan neih pawh Tertiary Care Cancer Centre (TCCC)-a hlankai a nih tawh thu sawiin thla hmasa lawk khan Union Health Minister Shri Jagat Prakash Nadda pawhin TCCC building sakna tur lungphum a phum tawh thu a sawi a. Mizo mipuiten cancer chungchanga inzirtirna leh inhrilhhriatna an neih that lehzual theih nan hmalak tum a nih thu a sawi bawk a ni.
Meetingah hian State Cancer Expert Committee din ni se tih te, kumin chhunga mipui hnena nasa zawka inhrilhhriatna neih dan tur bakah neih hun tur te, Mizoram State Cancer Institute (TCCC) chu Comprehensive Cancer Care Facility (Superspeciality Cancer Hospital) a hlankai a nih theihna atana hmalakna tur hrang hrang te rel niin sawihona neih a ni bawk.
H&FW Commissioner & Secretary Pu Lalrinliana Fanai, IAS chuan meeting hi a kaihruai a. Dr. BR Ambedkar, Institute-Rotary Cancer Hospital, AIIMS Chief Dr. GK Rath; B. Baruah Cancer Institute (BBCI), Guwahati Director Dr. AC Kataki leh Cancer Foundation of India, Kolkata Founding Chairman, Prof. M Siddiqi ten presentation an nei a. SNO (NCD) & PI, PBCR Dr. Eric Zomawia chuan ‘Cancer incidence & cancer control in Mizoram’ tih thupui hmangin thu a sawi. Medical Oncologist Dr. Jeremy L Pautu chuan Mizoram-a cancer treatment tihchangtlun dan tur a tarlang a. Dr. Priscilla Ngaihte chuan cancer chungchanga inhrilhhriatna neih dan tur tarlanna hun a nei a. H&ME Director Pi T. Lalhmangaihi chuan lawmthu sawina a nei bawk a. Meeting-ah hian H&FW, NHM, Mizoram State Cancer Institute (MSCI) leh Public Health Foundation of India (PHFI) hotute an tel a ni.
