Vawiin khan Lawngtlai District Road Safety Committee (DRSC) chu Lawngtlai DC Conference Hall-ah an thu khawm a. Kumin February ni 12-18 chhunga Road Safety Week vawi 29-na hman dan tur an sawi ho.

He hun hi Lawngtlai DTO Pu Lalrinawma MCS chuan a kaihruai a. Kum hmasa lama Week hman dan report ngaihthlak niin, kumina Road Safety Week hawnna chu February ni 12-ah DC Conference Hall-ah neih ni se, tih a ni a. A hawnnaah hian Lawngtlai DC chu Khuallian tur niin, sawrkar leh sumdawng lirthei khalhtute sawm khawm a, lirthei khalh chungchanga hriat tur pawimawhte inzirtirna hun hman tum a ni.

Road Safety Week hman chhung hian thuneitu (traffic leh enforcement) lamin uluk takin special drive beihpui thlak se, tih a ni a. Motor-a tar chi flag pawh siam leh tura ruahman niin, Week chhung hian fimkhur tura inzirtirna a zau thei ang bera buatsaih ni se, tih a ni. Hemi Week chhung hian driver tha ber, traffic police tha ber leh motor fai ber te thlan chhuah leh tur a ni a. He'ng thlan chhuahte hi February ni 22-ah DC Conference Hall-ah lawmman hlan an ni ang.