Vawiin khan DC Conference Hall, Mamit-ah District Level Fire Prevention Committee chu an chairman Pu Vanlalngaihsaka, District Bawrhsap Mamit hovin thutkhawm a ni.

Vawiin thutkhawmah hian Pu Lalnunsanga Khawlhring DFO Mamit chuan Kum 2018 chhunga District Level Fire Prevention hmalakna hrang hrang leh Mamit District chhunga ram ngaw kan neih dan leh kangmei laka kan ram kan chhiatdan dinhmun hrang hrang report a pe a ni.

Vawiin thutkhawmah hian Fire Prevention Week 2019 hmandan tur rel niin a hun thuah hian State Level Fire Prevention Committee thu nghah nise tih a ni a, a hmun a tan hian DFO Complex ah hman ni se tih a ni. Khuallian a tan hian Mamit Bialtu MLA Pu H. Lalzirliana sawm nise tih a ni a. Programme kimchang lo duang tur hian Member Secretary kutah dah a ni bawk.

Mamit District chhunga Lo/Leipui hal tur neite tan State Level Committee thu angin ni 15 March 2019 hmaa hal vek ni se tih a ni a, Lengpui khua leh a chhehvel tan tlailamah hal nise tih a ni bawk. Khawtin VC te DLAO in hriattirna lo pe se tih niin District Level Committee atangin hriattirna pek ve ni se tih a ni bawk. Ramkang veng tha khua thlan leh nise tih a ni a, hei bakah hian Village Level Fire Prevention Committee khawtinah din a ni em tih leh an hnathawh dan enpui nise tih a ni bawk. Kangmei ven kawnga hmalaknan YMA Sub Hqrs huam chhunga Group hrang hrang te'n Conference an neihna hmunah Awareness Campaign nei tura ruahmanna siam ni se tih a ni a, Sub Hqrs hruaitute biak rawn nise tih a ni bawk.

Meeting-ah hian Mamit khawpui chhunga Sawrkar Department aiawh, Tlawmngai pawl hrang hrang MHIP, YMA, MUP aiawh, Zirna lama thawktute bakah Mamit District chhunga Forest Range Officer te an tel a ni.