Vawiin hian Serchhip DC Conference Hall ah District Level Fire Prevention Committee te chu an thukhawm a, Fire Prevention Week, 2019 hman dan tur te, kumin thal chhova kangmei laka inven dan tur leh hmalak dan tur hrang hrangte an rel.

He meeting hi Pu R. Vanrengpuia, SDO Sadaar in a kaihruaia, Member Secretary Pu Lalduhthlana, DFO Thenzawl in kum danga hma lak tawh dante, kumin hmalak dan tura State Level Sub-Committee in ruahmanna a lo siam tawh dan te leh thil tul dangte chipchiar taka sawifiahna a neih hnuah member te hian Serchhip District-a hmalak dan tur hi an rel zui a ni.

Fire Prevention Week, 11^th – 16^th February, 2019 hawnna hi Government Serchhip College Multi-Purpose Hall-ah buatsaih tur ani a, Week chhung hian kawng hrang hranga Awareness buatsaih tur a nih bakah kumin thal khawro chhung zawng hian kangmei laka kan him theihna tur hmalakna chawl lova neih zui tum a ni. Ram kang ven hnathawk tha khua thlan leh tur a ni a, kangmei laka invenna lam hawi thu chhuah tha chanchinbu pawh thlan chhuah a ni ang. Education Department te nena tang hovin zirna in zawng zawnga Awareness neih te, YMA te nena thawk hova Branch tin nena hmalakna te, District chhung in tin thleng phak Awareness hmalakna tur te pawh duan a ni.

Lo hal hun tur atana State Level Sub Committee in March ni 15 hma a rawt chu khauh taka kenkawh a rel a, Dai hnai leh lo bing hal hun atan February thla ral hma nise tiin a rel bawk. Kangmei laka inven nan dan leh thupek a tul ang zela chhuah tura District Magistrate hnenah thlen ni se,tia a rel bakah ram kang a chhuah palha rang taka thuneitute hriattirna tur hmun thumah siam leh nise an ti bawk.