Vawiin chawhma dar 10:30 khan District Playground, Saiha Vengpui-ah Saiha District Village Level Sports Competition (P.Y.K.K. Tournament) 2009-2010 chu Saiha District Additional Deputy Commissioner, Pu Thangchem Zathang chuan a hawng. He Sports Competition hi Mizoram State Sports Council (P.Y.K.K.) Cell leh Saiha District Level Committee (PYKK) te tangkawpin an buatsaih a ni a, ni 16.10.2009 thleng neih tura ruahmanna siam a ni.

He Sports Competition hawnna inkhawm hi Er. N.Aldrin, Treasurer, Saiha District Sports Committee, Saiha chuan a kaihruai a, kalkhawmte hnenah he sports competition a an tel theih avangin lawm thu a sawi a, Pu T.T.Kholo, Secretary, Saiha District Sports Committee chuan sports buatsaih a nih theih dan te report tawi a pe bawk. Khuallian chuan thu sawiin Central leh Mizoram State sawrkar chungah hetiang sports an buatsaih sak theih avangin Saiha District PYKK hmingin lawmthu a sawi a, sports hlutzia hriaa central sawrkarin a tum ang ngei a he sports hi tihhlawhtlin tum theuh turin infiammi kalkhawmte chu a chah a ni. Thinlung leh tihtak zeta sports items chi hrang hrang te bei turin a ngen bawk. Sports hi khawvel sawrkar chak leh chak lo tehna pawimawh tak a nih thu sawiin Saiha District aiawh tura Mizoram Level Sports Meet a kal tura thlan an nih hunah pawh District tihmingtha tu ni tur leh tihtakzetna nen a bei turte, All India Level thleng phak thei turin infiammi te a chah bawk a ni.

He Sports Committee ah hian Sports Item chi hrang hrang chi 6 ah infiammi te an inel dawn a, Saiha District chhunga Village Council 18 atangin an infiammi te an tel dawn a ni, he Sports Meet-ah hian Items chi hrang hrang te point belhkhawm a nih hnu a Village Council point hmusang ber hnenah lawmman tangkafai Rs. 50,000/- pek a ni anga, pahnihna Rs. 30,000/- leh pathumna hnenah lawmman tangkafai Rs. 10,000/- pek a ni bawk dawn a ni.