Nihnih awh tur Serchhip District chhunga Middle School leh High School te tana buatsaih Inspire Award 2010 District  Level Science Exibition chu vawiin chawhma dar 10:00 khan District Bawrhsap Pu P.Lalchhuanga'n Government Serchhip High School-ah a hawng.

Bawrhsap chuan thusawiin Serchhip District chu Mizoram hmun laili taka awm a nih bakah India ram puma ziak leh chhiar tamna ber District anih bawk avangin mithiam an tam tur a ngaih a ni a, Mizoramah Science hmasawnna atan sulsutu District anih theih lohna chhan tur a awm lo ani a ti a, zirlai kalkhawmte chu an vanneihzia sawiin an lehkhazir lai chuan zirlaibu takngial pawh an hmuh mumal loh thin thu a sawi a, tunah chuan zirtirtu thiam leh tha tak tak te enkawlna hnuaiah hmanraw changkang tak tak te an hmang tawh a, hei vang hian zirna a hlawhchhamte chuan midang mawhpuh thei an ni lo vang a ti bawk.

Bawrhsap chuan tunlai thangtharte zingah science  a talent nei tha ten professional line a kal vek an tum hi thil tha ber a ni ang em ? tih hi chhut chian pawimawh a tih thu sawiin, Doctor leh Engineer kan mamawh rualin thangtharte science thiamna hlanchhawng zel tur mithiam leh scientist mamawhna pawh a nasa a, hemi atana INSPIRE AWARD siam ani chu lawmawm atih thu a sawi a, zirlaite chu hun lo kal zel tura Mizoram sukthlek siamtu tur an nih avangin tun atanga rilru nei taka zir tur a fuihin Science Exhibition chu zirlaite talent haichhuaka hlawhtlinna kawng sial sak tu anih a beisei thu a sawi bawk a ni.

Innovation of Science Pursuit for Inspire Research (INSPIRE) hi Sawrkar Laipuia Science & Technology Department-in hmathlir thui tak nei a zirlai science thiamna kawnga talent nei thate zawnchhuaha, an zirlaiah leh hma an sawn zel theihna tur atana ruahmanna a siam a ni a, zirlaite hamthatna tur scheme chi hrang hrang he programme hnuaiah hian a awm a ni. He programme hi Class 6 atanga Class 10 zirlaite tana tih a ni.

INSPIRE AWARD 2010 hnuaiah hian Sawrkar Laipui chuan Mizoram tan tangka fai cheng 79,45,000 a ruahman a, Mizoram chhunga zirlai science lama talent nei tha thlanchhuah 1589 hnenah Rs. 5000 theuha sem tur niin, Serchhip District atang zirlai 151 in he Award hi an dawng dawn a ni.

Serchhip District Science Exhibition ah hian Serchhip District chhunga Middle School leh High School hrang hrang atangin participant 106 an awm a, zirlaiten an thiamthil an chhawpchhuahte hi endik tura ruat bik ten tehfung hrang hrang pasarih hmanga an teh hnu a a titha zual thlanchhuahte chuan tun thla ni 28-29 a State-level Exhibition, Government Comprehensive Model School, Aizawl a neih torah Serchhip District ai an awh dawn a ni.

Attachment