Mizoram Olympic Association buatsaihin tukin zing khan infiamna chi hrang hrang associationa member ten Vaivakawn, Sikulpuikawn leh Chanmari atangte a tlanin Assam Rifles Lammualah an intawkkhawm a, hetah hian Chief Minister Pu Lal Thanhawla, Mizoram Olympic Association President chuan a hmanpui.

Chief Minister chuan he hun hi kum lama upa tawhte tan pawh intuai thar lehna ni a hman thin anih thu a sawi a.Mizoram Olympic Association chu chak taka a than chhoh zel thu sawiin, India Olympic Association in harsatna a tawh thuah, Secretary Ranbir Singh chuan a hnen atanga thurawn a rawn lak thute a sawi a. Mizo thalai infiammi ten rampum leh khawvel huapa hnehna an chang thin chu chhuanawm a tihthu sawiin, an tan hamthatna sorkarin hma a la mek zel a ni a ti a.Games and sports lamah Zoram thar siam turin leh India ti ropui zel turin duhsakna a hlan a ni.

Olympic Day Run hi International Olympic Committee din ni, june ni 23 denchhena neih thin a ni a. Olympic Day Run hi kum 1987 khan hman tan a ni a, hemi kum hian ram 45 in hmangin, infiammi ten km 10 an tlan a ni. Kum 2006 khan ram 161 in National Olympic Committee dinin km 1.5 tal an tlan thin bawk a ni.

Tukin zinga infiamna chi hrang hrang association 17 atangin mi 2335 an tel a, infiammi tel tam ber kum a ni. Association tel zawng zawngte hian lawmman certificate leh pawisa fai an dawng vek a. Member tel tam ber Mizoram Amateur Taekwandeo Association chuan member 624 telin pakhatna lawmman Certificate leh Rs.6000/- an dawng a, Pahnihna Volleyball Association member 379 telin certificate leh Rs.5000 dawngin, pathumna chu Table Tennis associatio member 205 telin certificate leh Rs.5000/- bawk an dawng a ni. Association dang zawng hian Rs.1000, Rs.3000 leh Rs.5000 te an dawng bawk.