Vawiin chhun dar 12:00 khan Dr. Franklin Laltinkhuma IAS, Deputy Commissioner/DEO Aizawl District kaihhruaina in a office chamber-ah District Level Standing Committee meeting neih a ni.

Village Council leh Local Council Election, 2015 vote thlak ni atan 30.4.2015, zing dar 7:00 atanga tlai dar 5:00 thleng ruat a ni a. Inthlan that a ngaih chuan 1.5.2015 ah neih a ni ang. Vote chhiar hi vote thlak ni ah vote thlak zawh veleh neih nghal tur a ni. Executive Body Formation hnuhnung ber atan 7.5.2015 ruat a ni a, 8.5.2015 ah chuan Election Process te chu neih zawh vek tur a ni. Khawruhlian Village Council bikah chuan last date for withdrawal of nomination hi 17.4.2015 dar 1:00 pm thleng a ni ang a, allotment of symbol chu ni 17.4.2015 dar 2:00 pm atangin a ni ang.

Aizawl District bikah Village Council 95 awmin Village Council 69 ah inthlanna neih tur a ni. Village Council Election atan hian seat 295 chuh turin candidate 810 awmin General ah candidate 611 leh reserved 199 a awm. Local Council Election atan seat 528 awmin General ah seat 387 leh reserved seat 141 a awm a ni. Candidate zat 1230 niin General-ah candidate 914 leh reserved ah 316 a awm a ni.

Village Council inthlanna atan Polling Station 69 awmin Polling Booth 80 a awm a, Local Council inthlanna atan Polling Station 83 leh Polling Booth 165 siam a ni.

Inthlanna muanawm leh felfai a awm theih nan venhimna pawh uluk taka ruahman a ni bawk.