Mizoram Horticulture Service Association chuan nimin khan Art & Culture Auditorium, Berawtlang-ah 18th General Conference an hmang. Conference hi Pu T. Liankunga, Vice President in a kaihruai a, hun hmasa lamah member thi sunna te, Member thar lak luhna leh MHS member Pu Hrangthankima pension thlahna te neih a ni.

Khuallian Pu R.Zotawna, Director of Horticulture chuan Horticulture hi mi taima hmathlir nei leh tumruh te mai bak ah thalaite tan hian eizawnna tlak leh ngialnghet a ni a, chuvangin, Horticulture mithiamte kaltlanga Mizo thalai tam zawk ten Horticulture lamah eizawnna nasa zawk an neih theihna tura rilru thar puttir a, hruai luh hi kan tih makmawh a ni a, chuvangin thalai tam zawk ten huan thlai hmanga ei zawn chakna an neih theihna tura hma la turin MHS member kalkhawmte chu a fuih ni.

He conference ah hian Division tin atangin member an kal tha hle a, Ram hmasawnna atan thalai tam zawk Horticulture hmalakna a hrui luh' tih Resolution chu lungrual takin an passed bawk a ni.