Kumin Assembly Inthlan atana inbuatsaihna kal zelah, vawiin khan Aizawl district huamchhunga District Level Standing Committee chu District Election Officer leh Aizawl DC ni bawk, Dr. Franklin Laltinkhuma hovin a pisaah an thukhawm.

Vawiin meeting-ah hian Election Commission of India chuan tum danga a la tih ngailoh EVM Ballot Unit-ah “NONE OF THE ABOVE (NOTA)” button chu candidate list tawp ber dawt chiahah dah tel a nih tur thu sawiin, hemi kaihhnawih thila instruction dang chu ECI atanga nghah mek a nih thu tarlan a ni a. Aizawl District chhung ami tur Returning Officer pasarih leh Asst. Returning Officer 14 bakah, ECI thuchhuak anga Candidate-te pawisa hman dan viltu tur Video Surveillance Team, Static Surveillance Team, Flying Squad, Video Viewing Team leh Accounting Team a tel turte pawh ruat fel tawh a nih thu vawiin meeting-ah hian tarlan a ni bawk.

Inthlan vuakvet chhungin hmun pawimawhah te power supply leh tui a khaihlak lohnan leh, inkalpawhna kawng enfiah hna leh inthlan nia motor felfai taka a kal theih nana mawhphurhna chu a changtu department theuhte kutah dah a ni a. Inthlan kaihhnawih chungchang engpawh hriat duh neiten zawhna an zawh theih nan Control Room siam a ni a, a biak theihna tur telephone number leh Officer duty turte pawh ruat fel a ni tawh bawk.

Kumin inthlanah hian Counting Centre atan Pachhunga University College chu hman tum a ni a, a hmunhmate enfel a nih hnuah Election Commission of India-ah remtihna dil a ni ang. Aizawl District chhungah Assembly Constituency 14 awmin Polling Station 323 a awm a, Presiding Officer 323 leh Polling Officer 969 tirh chhuah turte tan training pawh a tul dan anga pek an nih tur thu tarlan a ni bawk.

Vawiin meeting-ah hian Aizawl District huamchhunga RO, ARO, tlawmngai pawl leh sorkar department hrang hrang aiawhte bakah political party tin aiawhte an tel a ni.