Vawiin ni 11 October, 2013 hian I&PR Conference Hall, Mamit-ah Right To Information Week 2013 hlawhtling takin hman a ni.

He hun hi Pu R.S Lalzamliana Addl D.C Mamit in khuallian niin a hmanpui. Inkhawm Pu T. Vanlalmalsawmsanga SDO (Sadar) Mamit kaihhruaiah Pu R.S Lalzamliana Addl D.C Mamit chuan Right To Information Act hi sawrkar hmalakna hrang hrang mipuiten chiang kuang taka an hriat theih nana duan a nih thu leh langtlang sawrkar a awm theih nana din a nih thu a sawi a, Hemi kawngah hian khua leh tui dik takten kan chanvo dik tak kan chiang em tih hriat hi kan dikna a ni tiin chumi hmanrua RTI Act hi mitinte’n kan hman tangkai a tul a ni a ti bawk.

RTI Act chungchangah Department hrang hranga mawhphurtu SPIO, SAPIO te pawhin kan tih turte tha taka hlenchhuak thei turin kan in buatsaih a tul hle a ni a ti bawk.

Pu C. Lalnunkima Deputy Director, I&PR in Right to Information Act tobul leh lo dinchhoh dan bakah RTI Act hman tangkai dan chipchiar takin a sawi a ni.

Hemi zawh hian sawihona hun chairman kaihhruaina in neih a ni a, RTI Act chungchanga zawhna leh hriatfiah loh laite in hrilfiah a ni bawk.

Pu Micky Lalenkawla SDEO, Mamit chuan lawmthu sawina hun a hmang a ni.

He RTI Week 2013 Mamit a hmanna-ah hian Department tina SPIO, SAPIO, khawtlang hruaitute, tlawmngai pawl hrang hrang YMA, MHIP, MUP, PRISM leh thuthar thehdarhtute an tel a ni.