Vawiin khan Mamit District Level Standing Committee chu Pi Lalbiaksangi, District Election Officer/District Bawrhsap kaihhruaina in D.C Conference Hall, Mamit ah thutkhawm a ni.

Meeting-ah hian Election Commission of India duhdan anga ni 01.01. 2017 tehfunga hmanga Special summary Revision of Photo Electoral Rolls, 2017 neih tura programme duanlawkte thlir ho a ni a, Mamit District Draft Electorals Rolls, 2017 tarchhuah nghal niin thlirho zui a ni bawk.

Draft Electoral Rolls 2017 ah hian Mamit District ah vote nei mi 60968 an awm mek a, hetah hian mipa 30971 niin hmeichhia 29997 an awm a ni. Mamit District ah hian Booth Level Officer (BLO) 113 an awm mek a, hengte hi school leh office hrang hrang atanga ruat te an ni.

Vawiin meeting-ah hian kawrthah III polling station Govt Primary School II chu Govt Middle School a thlak tura Election Commission Of India pawmpuina nghahmek a nih thu tarlan a ni a, Teirei Forest khua ni thin chu Mizoram Sorkarin Hruaitluang tia hming a thlak tawh avangin Election Commission of India pawmpui tura thawn mek a ni bawk.

Kumdanga tih thin angin Electoral Registration Officer (ERO), Asst Electoral Registration Officer (AERO) ten Form chi hrang hrang thehluhte enfiahna an nei leh dawn a, he hunah hian political party aiawhte leh NGO aiawhte tel tura beisei an ni. NGO leh Party tinten an branch/ unit te hnenah hearing a official te thahnem ngai taka lo tawiawm tura lo hriattir tura tih an ni bawk.

Vawiin a draft electoral rolls tarchhuaha sawiselna neite tan vawiin atanga oct ni 14 thleng D.C Election Branch ah zawhfiah theih a ni ang. Final electorals Rolls hi ni 15 January 2017 ah tarchhuah tum a ni.

Vawiin meetingah hian District chhunga ERO, AERO, SP, Mamit, DEO, Mamit, DIPRO, Mamit leh tlawmngai pawl hrang hrang aiawhte leh party hrang hrang aiawhte an tel a ni. Draft Electoral rolls 2017 hi party aiawhte hnenah a copy pek nghal an ni bawk.