Nihnih awh (March ni 5 leh 6) mihring hmanga sumdawn do chungchanga Aizawl District tana training ‘District Level Traning of Trainers on Anti-Human Trafficking’ chu vawiin khan I & PR Auditorium-ah Mizoram Police hotulu Pu Lalrokhuma Pachuau IPS DGP chuan a hawng.

Training hawnaah Pu Lalrokhuma Pachuau chuan mihring bumchhuah emaw hruai chhuaha intihluihna hmanga nawhchi zawrh tir leh insal behna chu ‘Human trafficking’ in a huam a, he thil do hi India mai ni lovin khawvel pawh in nasa zawkin a buaipui a ni a ti. A thusawi ah hian DGP chuan Mihringa sumdawnna lo irhchhuah dan leh a than chho dan chanchin tlangpui a tarlanga, a sum kaihhnawih pawh ruihhlo leh ralthuam tawlhruk hnuah mihringa sumdawn chuan a dawt thu a sawi.

DGP chuan kum hnih leh chanve kalta khan Mizoram Police in Human Trafficking case pathum an buaipui thusawiin, a mawhphurtu nia puh te chu Mizoram Police chuan NGO te puihna in state dangah te kalin an man chhuak nghe nghe a, case te pawh siamsak anih thu a sawi bawk. DGP chuan mihring nunah sum duhawmna a sang zel avangin he thil hi a nasa tulh tulh zel dawn niin a lang a, ngaihtuah chian a, a do tura hma lak chak a tul thu a sawi bawk a ni. Sorkar Laipui chuan District tinah Anti Human Trafficking Unit din turin state sorkar tin te a beisei thu a tarlanga bawk a ni.

He Training Aizawl SP leh SP(Crime) tangkawp buatsaih ah hian Mizoram Police senior officer te, officer dangte bakah MUP, MHIP leh CYMA aiawh te an tel a ni.