Vawiin chawhma khan District Agriculture Office, Saiha buatsaihin ‘National Watershed Development Programme for Rainfed Area (NWDPRA)” training chu D.C.’s Conference Hall, Saiha-ah neih a ni. He training programme hi Dr. Chawngkhuma Chawngthu, President, AMFU, Saiha District chuan a kaihruai a, sawihawnna leh kalkhawmte inhmelhriat tirna a neih bakah hunserh a hmang nghal bawk a ni.

He training-na a khuallian Pu Rodney Lalrinawma, DC Saiha chuan thu sawiin thil eng pawh kan tih dawn hian thiam taka ti tur leh hlawhtling tur chuan training neih hmasak phawt hi a ngai a, taimakna, rinawmna leh chhelna pawh a ngai a ni, a ti. Kalkhawmte chu training tha taka nei tur leh midangte hrilh chhawng leh thei tur khawpa thiam bel tum turin a chah a, kan ram chereu tawh siam that lehna atana hmalakna pawimawh tak a nih thu sawiin Watershed Development Training hian thil tum pawimawh tak tak panga - 1) Leilung hausakna Pathian siamsa tha taka humhalh, 2) Agriculture atanga kan thlai tharchhuah te tih pun, 3) Ramngaw chereu chhe mek zel venhim leh ramngaw te siam belh tura thingphun, 4) Tui lak (irrigation) hmanga thlai thar tam zawk thar chhuah leh 5) Eizawnna awlsam zawk siam te a ni, a ti a. Pu S. Chinzah, Assistant Extension Officer, DAO Office Siha chuan ‘Watershed Aims & Objectives’ tih thupui hmangin kalkhawmte hnenah thu a sawi a. Pu Lalhmingmuana, Project Co-ordinator, KVK Saiha pawhin Project Management chi hrang hrangte a sawi bawk a ni.

He training programme hi session hnihah then a ni a. Chawhnu lamah Pu Israel Lalremruata, Subject Matter Specialist, KVK chuan ‘Afforestation’ tih thupui hmangin thu a sawi a. Pu Z. Lalduhawma, Gram Sevak (GS) DAO Office Saiha chuan ‘Watershed Account Keeping Audit’ tih thupui hmangin kalkhawmte hnenah thu a sawi bawk.

Training-ah hian Saiha District chhunga khaw hrang hrang 15 atangin mi 60 chuang an tel a. Zawhna leh chhanna hunte hman a ni a.