61st Batch recruit constables (4th IR Battalion) te chuan an training zovin vawiin khan Police Training Centre (P.T.C.), Thenzawl-ah Passing Out Parade an nei a. Mizoram Home Minister Pu Lalzirliana bakah Minister of State Pu N.K. Chakma, Parliamentary Secretaries leh MLA te, Mizoram DGP Pu Lalrokhuma Pachuau, Police leh Sorkar officials engemawzatin he hun hi an hmanpui a ni.

 

 

Khuallian Home Minister-in Parade Inspection a neih hnuah 4th IR Bn. constables ten rinawmna thutiam an la a, march past salute a chhan hnuin Home Minister chuan thu sawiin constable 468 training zova passing out parade hmangte chu chibai a buk a, duhsakna sang ber a hlan a ni. IR Battalion te dinhmun sawiin state police mai ni lo, India sorkar laipui nena kan intawm, Home Ministry-in a mamawh hun huna a koh chhuah theih an nih thu a sawi a. Indona hmunah emaw duty tura koh chhuah an nihna hmunah Mizo tlawmngaihna leh Kristian kan nihna, thian chhan thih ngam hnam huaisen kan nihna te lantir zel turin a chah bawk. IR Bn. state pawna kal tura tih lai khan mi thenkhat kal ngam lova mahni thua dan lekkawh awm te chu, an chungah an hotuten ngaih hnathiamna neih an tum loh thu sawi chhuakin Pu Zira chuan an hnathawhah rinawmna, dikna leh taimakna an neih phawt chuan malsawmna chu an ta anih zawk tur thu a sawi. Home Minister chuan police transfer dilna a hnena thehluh a nih fo thin chu hnathawh a ti harsat thu leh tun atanga reiloteah hetiang dilna te phal a ni tawh lovang, a ti bawk.

61st Batch Recruit Constables (under 4th IR Bn.) te hi nikum 20 August 2008 atang khan P.T.C. Thenzawl-ah training an nei tan a. An training chhung hian an duty-naa tangkai tur Subject hrang hrang zirtir an ni a. Damlohna leh harsatna avangin an zinga mi 10 te chuan training an zo thei lova, mi 27 te chu training la pek belh ngai an awm bawk a, hengte tel lovin vawiina Passing Out Parade hmang thei ta te chu an vaiin mi 468 an ni.

61st Batch training chhunga mimal ti thate a hnuaia mi an ni a, ni 6.8.2009-a PTC Lunverh-a Passing Out Parade an neih hunah an lawmman tur hlan an ang :-

1. Home Minister Trophy for Proficiency    -     R/C 30 Jacob Vanlalsiama
    in Legal Studies
2. IGP Running Trophy for Proficiency        -     R/C 138 Chhanchhuahkima
    in Physical Training
3. DIG (Trng) Running Trophy for        -     R/C 409 F. Lalhmangaihzuala
    Proficiency in Police Science

4th IR Bn. Staff dinhmun chu hetiang hi a ni : Commandant-1, Dy. Commandant-1, Asst. Commandant-NIL, Inspector-7, Sub-Inspector-20, ASI(M)-5, Havilder-49, Naik-43, Constable-92, Driver-18, Staff Nurse-2, lab Technician-1 leh IV Grade-55.