Vawiin chawhnu dar 11:00 khan Mizoram Legislative Assembly Speaker Pu R.Romawia’n 12th Mizoram Official Taekwondo Championship Electric Veng Y.M.A. Hall-ah a hawng. He Championship hawnna Inkhawm Mizoram Amateur Teakwondo Association buatsaih hi an pawl President Pu Rosiama Vanchhawng-in a kaihruai a, Association hmalakna te report pek anih zawhin Team angin Taekwondo Demonstration hmuhnawm tak entir a ni.

Assembly Speaker Pu Romawia chuan Association hruaitute leh infiammite chibai bukin he Championship hmang tura duhsak taka an sawm avangin lawmthu a sawi a Infiamna chi hrang hrang, Game discipline tam tak a awm a, tun hma te a kan la hriat lar lem loh kan hriatthar te zinga mi Taekwondo te pawh Association mumal tak dinin kan thalai te tan infiamna leh inelna a buatsaih avanga a lawmthu te tarlangin, infiammite chu mahni inthununna tha nei a an taksa chakna pe thei eitur tha chauh eia insumtheihna nei turin a fuih nghal a ni.

Speaker chuan, “Infiamna (Sports) lama Mizoram-in hma a sawn theih nan Sorkar chuan ruahmanna mumal tak a nei a ni” a ti a. Veng tinah khelmual zau mamawh lemlo, infiamna tha tak leh ram pum huap pawha Mizoram ti hmingtha thei chherchhuahna ni thei si bunna tur Sorkar chuan a dap mek thu a sawi bawk. Infiammite tan hamthatna tam tak a awm a ni tih hria a, chak ngei tura khel tur leh inelnaah mawi taka khel turin a fuih nghal bawk a ni.

He Championship hi India ram pum huap National Championship-a Mizoram aiawh tur thlanna atana buatsaih a ni nghal a, District pariat (8) atangin Team 33 an chhuak a, Participants zawng zawng hi 315 an ni.