Vawiin khan Lawngtlai DC Conference Hall ah Lawngtlai District Vigilance and Monitoring Committee chu an Chairman Pu CL Ruala, MP Lok Sabha hovin an thukhawm a, kumin January ni 21 atanga May ni 22 inkara District chhunga hmasawnna hnathawh hrang hrang te an thlir ho.

Pu C L Ruala chuan, Central ah sawrkar a inthlak avangin Central leh State indawr dan kalphung te a lo dang lam hlek a, Policy leh Programme kalpui dante pawh a then a zar thlak hlek hlek an lo ni a, chuvang chuan chak taka hnathawh a har rih deuh thei a ni, a ti a. Central leh State atanga hnathawhna tur pawisa kan dawn ang angten an tum ram an thlen ngei zel a ngaih avangin, chutiang ti tur chuan inpekna thuk zawk neih zel kan tum tur a ni tiin hna hrang hrang thawktu Department hotu kalkhawmte chu a hrilh a ni.

Tun Financial Year chhunga Monitoring Committee hmasa ber kan han nei leh thei hi a lawmawm a, Lawngtlai District chhunga MLA te pawh kim taka an rawn tel theih avangin lawmthu ka sawi a ni a ti bawk.

Committee Report in a tar lan thil pawimawh zualte chu; kumin chhungin Lawngtlai District chhungah MGNREGA atangin chhungkaw 27442 te hnenah inhlawhna ni 7 theuh siam sak tawh an ni a, hemi atan hian sum 782.837 lakh sen a ni. Vector Borne Disease Control Programme hnuaia Malaria Control bikah January leh May thla inkarah Malaria Pf vei mi 964, Pv vei mi 65 hmuhchuah an ni a, Malaria vanga boral an la awm lo thung. TB Control lamah chuan TB vei mi 35 hmuhchhuah thar an ni a, Treatment pek fel mi 38 an awm thung.

National Rural Drinking Water Programme hnuaiah khaw parukah tuilak hna thawh mek a ni a, sum sen tura ruahman chu 420.52 lakh a ni. Swachh Bharat Mission atangin ekin neilo chhungkua 2070 te chu ekin sak sak tura ruahman mek a ni a, PMGSY atangin inkalpawhna tur engemawzat laih mek a ni bawk.

Vigilance and Monitoring Committee ah hian Minister of State pahnih Pu C. Ngunlianchunga leh Dr BD Chakma, Parliamentary Secretary Pu H. Zothangliana, Pu J. Hmingthanmawia, Lawngtlai Bawrhsap bakah District Officers leh LADC atangin Officer engemawzat an tel a ni.