Nimin  khan Kaladan Multimodal Transit Transport Project thawh mek chu PWD Engineer-in-Chief Pu R. Vanlaltluanga’n a tlawh a, hma lakna hrang hrangte a hmunah a en.

Look East Policy (Act East Policy tite pawha sawi) kalpui meka hmun pawimawh tak luahtu Myanmar ram kaltlanga tuifinriat a chhuahka kan neih theihna tura kawngpui sial mek hi Lawngtlai atanga Myanmar ramri thleng atan a tirah km 99.83 survey ani a, hmun thenkhatah kawng kual laite siam remin, ruahmanna awmsa thlak danglam a nih leh hnuah km 90 vela zawh theih beisei ani. Contractor pahnih RDS Project Ltd. New Delhi leh ARSS Project Ltd.Orissa te chu thawhtir niin cheng vaibelchhe 677 senna tura ruahman ani a, tun ah hian vaibelchhe 419.07 vel hmangral tawhin hna thawh tur zaa sawmruk pahnih (62%) an thawk tawh niin an insawi.

Tun dinhmunah kawng hi Km 8 vel chu mumal taka laihzawh fel a la ni lo deuh va, km 65 chu lung phah zawh tawh niin km 6 a thui chu Black Topping tih zawh tawh a ni a, kawng chhuat hi Meter 12 a zau tur niin a chhuat zawla meter 11.4 chin hi lung phah tur a ni. Black Top chin tur hi Meter 7 (Feet 22.11) a zau a ni dawn a, Lungphah chin hi Meter 11.4 a nih avangin Black Top chin bakah pawh hian motor tlan theih tura lungphah a la zau thawkhat hle tho tihna a ni. Km 90 huam chhungah hian leihlawn 8 dawh ani bawk ang.

Pu R.Vanlaltluanga’n Multi Modal kawng a tlawh pah hian PMGSY hmanga kawngpui siam mek te, Lawngtlai Civil Hospital OPD Building siam mek te leh Thingkaha Poly-Technic Building sak mek pawh a en nghal a ni.