Pu Joseph Lalhimpuia, Parliamentary Secretary chuan vawiin khan Govt. Chaltlang HSS in HSSLC result tha lawmna leh zirlai tharte lawmluhna inkhawm Vanapa Hall a neih chu a hmanpui.

Pu Lalhimpuia chuan he school in result tha tak a nei thin chu zirtirtute inpumkhatna leh inlungrualna mai bakah an thahnemngaihna leh an thawhrimna zar a ni a ti. Mizoramah sikul hmasa ber hawnni chu 2 April, 1894 niin he sikula zir hmasa te chu M. Suaka, Durtlang Lal leh Thangphunga, Chaltlang Lal te an nih thu sawiin Pu Lalhimpuia chuan A AW B thiam hmasa ber pahnih zinga pakhat chu Chaltlang ami anih angin Chaltlangah hian zirna eng hi a lo chhuak hma hle a ni, a ti. He school a kal naupangte chu an zirtirtuten thahnem ngai taka an zirtir chu thiam tuma an school value siam turin a chah.

Pu Joseph Lalhimpuia hian Incentive Award (Rs. 10,000 keng) chu Art a topper V.L. Malsawmtluangi hnenah a hlan a. Hei bakah hian heng subject a topper : James Lalthankhuma, Psychology leh V. L. Malsawmtluangi, Psychology leh Political Science a topper te hnenah certificate a hlan a. He school atang hian Psychology subject bikah hian tum 16 topper an awm tawh a. Political Science subject ah topper tum 8 an awm tawh bawk a, Psychology Lecturer Lalramengi Ralte, Lalfakzuali Hmar leh Political Science Lecturer H. Lalsangzuala, Vanhmingliani Tochhawng leh H. Lalliantluanga te hnenah chawimawina certificate hlan a ni bawk.