Vawiin chawhma dar 10 :00 AM khan “District Level Vigilance & Monitoring Committee” chu Chairman, Pu C.L.Ruala, Hon’ble M.P. (Lok Sabha) leh Co-Chairman, Pu Ronald Sapa Tlau, Hon’ble M.P. (Rajya Sabha) hovin DCs Conference Hall, Siaha-ah neih ani.

He meeting hi Pu Ronald Sapa Tlau, Hon’ble M.P. (Rajya Sabha) chuan kaihruaiin he meeting nei tura Siaha a an lo kal hian awmzia a nei tur ani tiin sawrkar department hrang hrang te hian pawisa hi anihna tur ang takin an hmang em tih leh pawisa te hi a dawngtu tur dik takin an dawng ngei em tih enfiah tura lokal an nih thu a sawi a, Siaha District a sawrkar hna thawk tute chu he District a ka awm chhung in sawrkar leh mipuite tan eng thil tha nge ka tih ve theih ang tih thinlunga inzawt fo turin a chah ani.

Meeting ah hian Siaha District chhunga sawrkar development department hrang hrang hna thawh dan endik niin Rural Development Department hnuaiah DRDA Siaha, BDO (Tuipang), BDO(Siaha) DCAO(IWMP) leh DHO(IWMP) te bakah PWD Siaha, CMO Siaha, PHED Department, Siaha, P&E Department Siaha, DEO Siaha, SSA Siaha, DSWO, Siaha leh CDPO Siaha te chuan an department hmalakna hrang hrang leh an hnathawh tawh te bakah an hmachhawp mek te pawh chipchiar takin report an pe a, an hnathawhna a harsatna an tawh hrang hrang te pawh M.P. te hnenah hian an thlen nghal a, an harsatna tawh te sutkian dan tur te pawh huamzau tak a sawiho nghal ani bawk.

He Meeting ah hian Pu Hiphei, Speaker, Mizoram Lagislative Assembly, Pu R.Zarzosanga, District Bawrhsap, Department hrang hrang hotute, Tlawmngaipawl hrang hrang hruaitute leh Chanchinthar thehdarh tute an tel kim hle ani.