Vawiin khan DC Conference Hall, Kolasib-ah Parliamentary Secretary leh Turial Assembly Constituency bialtu MLA ni bawk Pu Hmingdailova Khiangte hovin Sansad Aadarsh Gram Yojana (SAGY) hnuaia Model Village atana thlan Thingdawl-ah ruahmanna hmasawnna atana thil chhawpchhuah leh ruahmanna siamte sawi ho a ni.

Pu Hmingdailova Khiangte chuan Model Villlage ina a tum ber chu hmasawnna ruhrel bun lam nilovin hmasawn tura mihringte rilru sukthlek siamthat leh an ngaihtuahna te her rem a, kawng tin renga hmasawn duhna rilru put tir a, an nun chawikan a ni, a ti a. Model Village atana hmalakna 10 chhawpchhuah te chu theihtawp chhuahpui turin Department aiawhte sawmin heng ruahmanna te hi tihlawhtling ngei turin ka sawmin ka ngen duh che u a ni, a ti bawk.

Meeting kaihruaitu Kolasib DC Pu H. Lalengmawia, IAS chuan Model Village atan hian sum a hranpa a dah a awm lova chuvangin kan thawhho thiam danah leh lungrual taka Department hrang hrang ten pheikhairual taka kan hmalaknaah hian a hlawhtlinna a innghat a, kan zavaia kutah a awm a ni, a ti a. Model Village chungchangah hian mipui lam beiseinna a san avangin, a dawnsawn dan an thiam nan a tum te hi chiang taka inhrilh leh sawi chhawn a ngaih thu DC hian a sawi bawk a ni.

Thingdawl BDO Pu V. Lalruatliana chuan Model Village atana hmalak tawh chin te leh hmachhawp an neih te sawiin kawng hrang hranga inbuatsaihna kalpuina a tarlang a. Hemi hnu hian Model Village atana thil chhawpchhuah 10 te chu Department hrang hrang aiawhte an sawi zau a, hma lak an tum dan an sawi theuh bawk a ni.

Meeting chuan Village Development Plan chu February ni 25 aia tlai lova tihfel nise tih leh he Plan hi Thingdawl mipui ten an pawm theih nan Gram Sabha chu February ni 29 ah neih nise tih a rel a ni.